Albaniya hukumati tarixda ilk bor sunʼiy intellekt botini vazirlik lavozimiga tayinladi. Bu haqda Reuters xabar berdi.

Diella deb ataladigan bu virtual vazir davlat tenderlarini boshqaradi va xususiy kompaniyalar bilan tuziladigan shartnomalarni taqsimlaydi.

Bosh vazir Edi Ramaga koʻra, Diella pora yoki tahdidlarga berilmaydi va shu yoʻl bilan davlat xaridlarida yuz beradigan korrupsiyani butunlay yoʻq qilish maqsad qilingan.

Albaniyada tenderlar sohasida korrupsiya muammosi uzoq yillardan beri mavjud. Mamlakat Bolqon mintaqasida giyohvand moddalar va qurol savdosidan tushgan pullarni “yuvuvchi” jinoiy guruhlar markazi sifatida tanilgan. Shu sababli Albaniyaning Yevropa Ittifoqiga qoʻshilish jarayoni ham qiyinlashib kelmoqda.

Hukumat hozircha Diella ustidan qanday insoniy nazorat boʻlishi, uni manipulyatsiya qilish xavflari qanday oldi olinishi haqida izoh bermadi.

Aslida Diella yil boshida e-Albania raqamli platformasida virtual yordamchi sifatida ish boshlagan edi. U anʼanaviy alban kiyimida tasvirlanadi, fuqarolar va tadbirkorlik subʼektlariga ovozli buyruqlar orqali xizmat koʻrsatadi.

Bot elektron muhr bilan hujjatlar chiqaradi va shu orqali byurokratik kechikishlarni kamaytiradi. Endi esa u hukumat darajasiga koʻtarilib, davlat xaridlarini boshqarish vazifasini oldi.

Lekin hamma ham bunga ishonmayapti. Ijtimoiy tarmoqlarda foydalanuvchilardan biri “Albaniyada hatto Diella ham korrupsiyaga botadi” deb yozdi. Yana biri esa “Oʻgʻrilik baribir davom etadi, ayb esa Diella'ga yuklanadi” deb hazillashdi.

Albaniya korrupsiyaga qarshi kurashish uchun sunʼiy intellektni vazir etib tayinladi