Dunyodagi eng kuchli AI: OpenAI GPT-6 Astra modelini taqdim etdi

OpenAI murakkab vazifalarni mustaqil bajarishga moʻljallangan yangi GPT-6 Astra sunʼiy intellekt modelini taqdim etdi. Kompaniya GPT-6 Astra’ni hozirgacha yaratgan “eng aqlli va eng yaxshi moslashtirilgan” modeli sifatida taʼriflamoqda. U tadqiqot olib borish, kod yozish, hujjat, jadval va taqdimotlar tayyorlash, internetdan maʼlumot izlash hamda kompyuterdagi dasturlar bilan ishlash kabi koʻp bosqichli vazifalarni bajara oladi.

Modelning asosiy farqi shundaki, u foydalanuvchining har bir keyingi koʻrsatmasini kutib turmasdan, topshiriqni bajarish uchun zarur vositalarni tanlashi va ish jarayonini boshidan oxirigacha olib borishi mumkin.

Astra raqiblaridan qanchalik kuchli?

OpenAI eʼlon qilgan Agents’ Last Exam sinovida GPT-6 Astra 59,3 foiz natija qayd etgan. Bu Claude Opus 5’dan 3,8 foiz punkt, GPT-5.6 Sol’dan esa 5,7 foiz punkt yuqori.

Ilmiy vazifalarni kod va terminal yordamida bajarish qobiliyatini tekshiradigan Terminal-Bench Science sinovida Astra 64,6 foiz natija koʻrsatgan. Claude Fable 5.1’da bu koʻrsatkich 52,6 foiz, Claude Opus 5’da 30 foiz, GPT-5.6 Sol’da esa 22,4 foizni tashkil etgan.

Murakkab matematik masalalardan iborat FrontierMath Tier 4 sinovida Astra 97,6 foiz natijaga erishgan. Taqqoslash uchun, Claude Fable 5.1 — 87,8 foiz, GPT-5.6 Sol — 83 foiz, Claude Opus 5 esa 73,2 foiz qayd etgan.

Ayni paytda yangi model barcha testlarda ham yetakchilik qilmagan. Vositalardan foydalanishga ruxsat berilgan Humanity’s Last Exam sinovida Astra 57,2 foiz natija koʻrsatgan. Claude Fable 5.1 esa 65 foiz bilan undan 7,8 foiz punkt yuqori natija qayd etgan.

Mustaqil Artificial Analysis baholashida ham GPT-6 Astra 61 ball bilan GPT-5.6 Sol’ga tenglashgan, biroq 66 ball olgan Claude Fable 5.1’dan ortda qolgan. Demak, Astra OpenAI tanlagan qator sinovlarda yetakchilik qilsa-da, uni barcha mezonlar boʻyicha mutlaq eng kuchli model deb boʻlmaydi. 

Kiberxavfsizlik imkoniyatlari cheklanadi

Astra’ning eng katta ustunligi kiberxavfsizlik sinovlarida koʻrinadi. ExploitBench’da u 100 foiz natija qayd etgan. GPT-5.6 Sol’da bu koʻrsatkich 78,5 foiz, Claude Opus 5’da esa 70 foizni tashkil qilgan.

Yangiroq zaifliklarni qamrab olgan ExploitBench sinovida ham Astra 39 foiz, GPT-5.6 Sol esa 11,5 foiz natija koʻrsatgan. Yaʼni yangi modelning natijasi avvalgi avlodnikidan qariyb 3,4 baravar yuqori.

OpenAI Astra’ni kompaniyaning “kritik” darajadagi kiberxavfsizlik salohiyatiga yetgan birinchi modeli sifatida baholamoqda. Tegishli vositalar berilganda u yaxshi himoyalangan tizimlardagi ilgari nomaʼlum zaifliklarni topishi va ulardan foydalanish usullarini ishlab chiqishi mumkin.

Shu sababli modelning eng kuchli kiberxavfsizlik funksiyalari barcha foydalanuvchilarga ochilmaydi. Ulardan dastlab OpenAI tekshiruvidan oʻtgan tashkilotlar va xavfsizlik mutaxassislari foydalanadi.

OpenAI prezidenti: “AGI davriga kirdik”

Model taqdimotida OpenAI prezidenti va hammuassisi Greg Brokman Astra sunʼiy umumiy intellekt — AGI paydo boʻlganining belgisi boʻlishi mumkinligini aytgan.

“Menimcha, biz bunga erishdik”, degan Brokman. U jurnalistlar bilan brifingni “AGI davriga xush kelibsiz” degan jumla bilan yakunlagan. 

AGI odatda turli sohalardagi vazifalarni oʻrganishi hamda iqtisodiy ahamiyatga ega ishlarning aksariyatida insondan ustun natija koʻrsatishi mumkin boʻlgan yuqori darajada avtonom tizim sifatida tushuniladi.

Biroq AGI’ning yagona va umumeʼtirof etilgan mezoni mavjud emas. Shu bois Brokmanning bayonoti GPT-6 Astra’ning rasman AGI deb tan olinganini anglatmaydi.

Bir milliondan ortiq tokenni qayta ishlaydi

GPT-6 Astra’ning kontekst oynasi 1,05 mln tokenni tashkil etadi. Bu modelga bir topshiriq doirasida juda katta hajmdagi hujjatlar, kod yoki boshqa matnli maʼlumotlarni tahlil qilish imkonini beradi. Bitta javobning maksimal hajmi esa 128 ming token bilan cheklangan.

512 mingdan 1 mln tokengacha boʻlgan uzun kontekst sinovida Astra 96,3 foiz natija koʻrsatgan. GPT-5.6 Sol’da bu koʻrsatkich 73,8 foiz boʻlgan — farq 22,5 foiz punktni tashkil etadi.

Model matn va tasvirlarni qabul qiladi, biroq audio hamda videoni bevosita qayta ishlamaydi. Undagi maʼlumotlarning yakuniy sanasi 2026 yil 30 aprel etib belgilangan.

Dastlab GPT-6 Astra OpenAI’ning Trusted Access dasturidagi tashkilotlarga taqdim etiladi. Keyingi kunlarda undan ChatGPT Plus, Pro, Business va Enterprise tariflari hamda API foydalanuvchilari foydalanishi mumkin boʻladi. Bepul tarif uchun model qachon ochilishi hozircha maʼlum emas.

API’da 1 mln kiruvchi token 10 dollar, chiquvchi token esa 50 dollar turadi. Mustaqil hisob-kitoblarga koʻra, Astra kamroq token sarflasa ham, bitta vazifani bajarish GPT-5.6 Sol’ga nisbatan oʻrtacha 75 foiz qimmatroq tushishi mumkin