Ўзбекистон 7 ойда бутун 2024 йилдагидан кўпроқ олтин сотди

Ўзбекистон етти ойда бутун 2024 йилга нисбатан кўпроқ олтин экспорт қилди. Бу ҳақда Миллий статистика қўмитаси маълумотида келтирилган.

Июнь ойидаги танаффусдан сўнг Ўзбекистон яна олтин сотишни бошлади. Июль ойида амалга оширилган экспорт ҳажми $1,09 млрдни ташкил этди. Ойлик кесимда қаралганда, мамлакат февраль ойида $1,73 млрд, март ойида $1,84 млрд, апрель ойида $1,91 млрд ва май ойида $1,01 млрд долларлик олтин экспорт қилган.

Ўзбекистон фақат январь ва июнь ойларида олтин сотмасдан, аксинча сотиб олган.

Етти ойлик якунларга кўра, қимматбаҳо металл экспорти $7,58 млрдга етди. Шу тариқа, олтин сотуви етти ой ичида ўтган йилги кўрсаткичдан ($7,48 млрд) ошиб кетди.

Ўзбекистон июнь ойида тўрт ой кетма-кет сотувдан сўнг олтин харид қилишга ўтган эди. Шу ойда жаҳон марказий банклари ўз олтин захираларини жами 22 тоннага оширган бўлса, шундан 9 тоннаси Ўзбекистон ҳиссасига тўғри келган.

Эътиборлиси, бунга қадар мамлакат кетма-кет тўрт ой давомида олтин сотувчиси бўлиб келган эди. 

Хусусан, февраль ойида мамлакат 12 тонна олтин экспорт қилиб, 8 тонна сотган Қозоғистондан ўзиб кетган. Март ойида ҳам 11 тонна олтин экспорт қилиниб, бу позиция сақлаб қолинади. Апрель ойида эса 11 тонна олтин экспорт қилинган бўлиб, унинг умумий қиймати 1,91 миллиард долларни ташкил этган.

Бироқ май ойида Ўзбекистон атиги 1 тонна олтин экспорт қилиб, иккинчи ўринга тушди. Июнь ойида эса мамлакат олтин сотмаган, аксинча, энг кўп миқдорда харид қилгани билан ажралиб турди.

Аввалроқ, Pinkod Ўзбекистонда бир ҳафта ичида тўртта олтин конидан фойдаланиш ҳуқуқи сотилгани ҳақида хабар берган эди. 

Бошланғич нархи бир неча миллиард сўм бўлган ушбу майдонлар ўнлаб баробар юқори баҳога харид қилинган. 

Ушбу ҳудудлардаги олтин захиралари эса 2 тоннадан 6 тоннагача баҳоланган.