Ўзбекистон олтин захиралари йил бошидан бери 26 тоннага камайди
Марказий банк кетма-кет учинчи ойда ҳам олтин сотиш бўйича жаҳонда етакчиликни сақлаб қолди. Апрель ойида Ўзбекистон 11 тонна олтин сотган.
Ўзбекистон апрель ойида ҳам олтин сотиш бўйича дунёда етакчиликни сақлаб қолди. Бу ҳақда Жаҳон олтин кенгаши маълумот берди.
Мамлакат Марказий банки кетма-кет учинчи ойда соф олтин экспорти бўйича глобал миқёсда етакчи бўлиб турибди. Апрель ойида банк 11 тонна соф олтин сотган бўлса, йил бошидан буён бу кўрсаткич 26 тоннага етган.
Мазкур даврда Полша олтин хариди бўйича етакчи бўлди. Полша Марказий банки апрель ойида захирасини 12 тоннага ошириб, йил бошидан буён жами 61 тонна олтин сотиб олган.
Ундан кейинги ўринларда эса Чехия (3 тонна), Хитой, Туркия ва Қирғизистон (ҳар бири 2 тоннадан), шунингдек Қозоғистон ва Иордания (1 тоннадан) қайд этилган.
Эслатиб ўтамиз, февраль ойида Ўзбекистон 12 тонна олтин экспорт қилиб, Қозоғистондан (8 тонна) ўзиб кетган ва жаҳонда энг йирик олтин сотувчиси бўлган. Март ойида эса мамлакат яна 11 тонна олтин сотиб, бу позицияни сақлаб қолган.
Апрель ойида экспорт қилинган олтин қиймати $1,91 млрдга тенг бўлди.
Шунингдек, апрель ойида Ўзбекистоннинг халқаро олтин-валюта захиралари ҳам рекорд даражага етди. У ўтган ойга нисбатан $1,4 млрдга кўпайиб, $49,25 млрдни ташкил этди.
