Ўзбекистон июнь ойида жаҳон бўйича энг кўп олтин харид қилган давлат бўлди
Ўзбекистон июнь ойида 9 тонна олтин харид қилиб, жаҳон миқёсида энг йирик харидор сифатида қайд этилди. Эътиборлиси, бунга қадар мамлакат кетма-кет тўрт ой давомида олтин сотувчиси бўлиб келган эди.
Жаҳон олтин кенгаши (World Gold Council) маълумотларига кўра, 2025 йилнинг июнь ойида Ўзбекистон Марказий банки энг кўп олтин харид қилган марказий банк сифатида жаҳон етакчисига айланган.
Июнь ойида дунё марказий банклари ўз олтин заҳираларини жами 22 тоннага оширган бўлса, шундан 9 тоннаси Ўзбекистон ҳиссасига тўғри келган.
Эътиборлиси, бунга қадар мамлакат кетма-кет тўрт ой давомида олтин сотувчиси бўлиб келган эди.
Хусусан, февраль ойида мамлакат 12 тонна олтин экспорт қилиб, 8 тонна сотган Қозоғистондан ўзиб кетган. Март ойида ҳам 11 тонна олтин экспорт қилиниб, бу позиция сақлаб қолинади. Апрель ойида эса 11 тонна олтин экспорт қилинган бўлиб, унинг умумий қиймати 1,91 миллиард долларни ташкил этган.
Бироқ май ойида Ўзбекистон атиги 1 тонна олтин экспорт қилиб, иккинчи ўринга тушди. Июнь ойида эса мамлакат олтин сотмаган, аксинча, энг кўп миқдорда харид қилгани билан ажралиб турди.
Июнь ойида 7 тонна олтин харид қилган Қозоғистон Миллий банки иккинчи ўринни эгаллади. Хитой Халқ банки, Туркия Марказий банки ва Чехия Миллий банки эса ҳар бири июнь ойида 2 тоннадан олтин харид қилган.
Биринчи ярим йиллик
Шу билан бирга, Ўзбекистон 2025 йилнинг биринчи ярмида қимматбаҳо металларни сотиш бўйича ҳам етакчиликни сақлаб қолмоқда — мамлакат шу давр ичида қарийб 18 тонна олтин экспорт қилган. Солиштириш учун, Сингапур бироз камроқ — 16 тонна олтин сотган.
Бошқа томондан, олтин хариди бўйича етакчилик Полша Миллий банкига тегишли — у ярим йил ичида 67 тонна олтин сотиб олган. Иккинчи ўринда 35 тонна билан Озарбайжон Давлат нефть фонди, учинчи ўринда эса 22 тонна билан Қозоғистон жой олган.
