Oʻzbekiston iyun oyida jahon boʻyicha eng koʻp oltin xarid qilgan davlat boʻldi

Jahon oltin kengashi (World Gold Council) maʼlumotlariga koʻra, 2025 yilning iyun oyida Oʻzbekiston Markaziy banki eng koʻp oltin xarid qilgan markaziy bank sifatida jahon yetakchisiga aylangan.

Iyun oyida dunyo markaziy banklari oʻz oltin zahiralarini jami 22 tonnaga oshirgan boʻlsa, shundan 9 tonnasi Oʻzbekiston hissasiga toʻgʻri kelgan.

Eʼtiborlisi, bunga qadar mamlakat ketma-ket toʻrt oy davomida oltin sotuvchisi boʻlib kelgan edi. 

Xususan, fevral oyida mamlakat 12 tonna oltin eksport qilib, 8 tonna sotgan Qozogʻistondan oʻzib ketgan. Mart oyida ham 11 tonna oltin eksport qilinib, bu pozitsiya saqlab qolinadi. Aprel oyida esa 11 tonna oltin eksport qilingan boʻlib, uning umumiy qiymati 1,91 milliard dollarni tashkil etgan.

Biroq may oyida Oʻzbekiston atigi 1 tonna oltin eksport qilib, ikkinchi oʻringa tushdi. Iyun oyida esa mamlakat oltin sotmagan, aksincha, eng koʻp miqdorda xarid qilgani bilan ajralib turdi.

Iyun oyida 7 tonna oltin xarid qilgan Qozogʻiston Milliy banki ikkinchi oʻrinni egalladi. Xitoy Xalq banki, Turkiya Markaziy banki va Chexiya Milliy banki esa har biri iyun oyida 2 tonnadan oltin xarid qilgan.

Birinchi yarim yillik

Shu bilan birga, Oʻzbekiston 2025 yilning birinchi yarmida qimmatbaho metallarni sotish boʻyicha ham yetakchilikni saqlab qolmoqda — mamlakat shu davr ichida qariyb 18 tonna oltin eksport qilgan. Solishtirish uchun, Singapur biroz kamroq — 16 tonna oltin sotgan.

Boshqa tomondan, oltin xaridi boʻyicha yetakchilik Polsha Milliy bankiga tegishli — u yarim yil ichida 67 tonna oltin sotib olgan. Ikkinchi oʻrinda 35 tonna bilan Ozarbayjon Davlat neft fondi, uchinchi oʻrinda esa 22 tonna bilan Qozogʻiston joy olgan.