Марказий банк Банк назорати қўмитасининг қарорига асосан “Мароқанд” АЖга нисбатан аввал жорий этилган айрим тўлов хизматларига доир чекловлар бекор қилинди. Мазкур компания ўз хизматларини Upay бренди остида амалга оширади.

2024 йил октябрь ойида Марказий банк Upay фаолиятини вақтинча чеклаганди. Сабаб сифатида компания қимор ўйинларига тўловлар қабул қилинишига йўл қўйгани кўрсатилган. Чеклов муддати олти ой этиб белгиланган эди.

Маълумот учун, 2022 йилда Upay’нинг 100 фоиз улуши Humans компанияси томонидан сотиб олинган. Компания тўлов хизматлари “Humans Pay” номи остида айнан шу платформа орқали кўрсатиб келинади.

Чеклов эълон қилингач, Humans бош директори бу қарорни адолат тамойилларига зид деб ҳисоблашини айтган. “Чекловлар сабаби ўйинлар билан боғлиқ амалиётлар эканлигини биз бугун ОАВдаги хабарлардан билдик”, — деган Добрйнин.

Марказий банкнинг ўша пайтдаги раиси Мамаризо Нурмуродов эса бунга қуйидагича изоҳ берган:

“Upay ноқонуний операциялар билан шуғуллангани сабабли уч марта Банк қўмитасига чақириб, оғохлантирганмиз. Биз тўлов ташкилоти агентини (Humans) оғохлантирмаймиз. Чеклов қимор ўйинлари билан боғлиқ бўлган”.

Чеклов Humans’нинг молиявий натижаларига жиддий таъсир кўрсатди. 2024 йилнинг учинчи чорагида компания атиги 3,5 миллиард сўм соф фойда кўрсатди. Бу ўтган йилнинг шу даврида қайд этилган 20,4 миллиард сўмлик фойдага нисбатан 80 фоиздан ортиқ камайишни англатади.

Шунингдек, кейинчалик биржада Humans акциялари билан боғлиқ операциялар ҳам вақтинча тўхтатилгани ҳақида хабар берилган эди.

Humans’га тегишли Upay фаолиятига қўйилган чеклов бекор қилинди