Суд Humans’га Octobank олдидаги қарздорликни қоплаш мажбуриятини юклатди

13 июнь куни Тошкент туманлараро иқтисодий судида Octobank АЖ ҳамда Humans МЧЖ ўртасидаги иқтисодий низо бўйича суд мажлиси бўлиб ўтди. 

Суд Humans МЧЖнинг шартномавий мажбуриятларини расман тасдиқлади ва унга банк олдидаги қарздорликни тўлиқ қоплаш юклатилди.

Octobank қабул қилинган суд қарорини қонуний ҳимоя стратегиясининг бир қисми сифатида баҳолаб, барча ҳамкорлар билан очиқ ва шаффоф ҳамкорлик қилишга тайёрлигини маълум қилди.

Маълумот учун 11 июнь кунги хабарда даъво миқдори 500 млрд сўм эканлиги таъкидланган. 

Банк, шунингдек, Humans карталарига хизмат кўрсатиш 13 июнь куни соат 18:00 дан бошлаб тўхтатилганини маълум қилди. Бу чора Octobank томонидан 11 июнь куни эълон қилинган эди.

Банкнинг расмий баёнотида таъкидланишича, мазкур қарор Humans МЧЖ томонидан шартнома шартларининг мунтазам равишда бузилиши, яъни кўрсатилган хизматлар учун ўз вақтида тўлов амалга оширилмагани ҳамда молиявий мажбуриятларни инкор этиш ҳолатлари ортидан қабул қилинган.

Шу муносабат билан, Humans кобренд карталаридаги барча пул маблағлари Humans МЧЖнинг молиявий сервисларидаги мижозларга тегишли шахсий ҳисобларга ўтказилади.

Бу маблағлар билан боғлиқ барча операциялар ва қолдиқлар энди фақат Human МЧЖ ҳисобварағида юритилади.

Мижозлар ўз маблағларини қайтариб олиш зарурияти туғилганда, тўғридан-тўғри Humans МЧЖга мурожаат қилишлари керак бўлади.