Қидирувдаги банкирлар, ошган NPL ва пенсия ёшини ошириш таклифи — ҳафта дайжести

UzAuto Motors хусусийлаштиришга тайёрланмоқда

Давактив яқин вақт ичида UzAuto Motors’даги 99,7 фоиз ва UzAuto Motors Powertrain’даги 100 фоиз давлат улушини сотиш бўйича тендер эълон қилишни режалаштирмоқда. Бундан ташқари, давлат яна тўққизта компаниядаги улушларини жами 476,9 млрд сўм бошланғич нархда савдога қўйди. UzAuto бўйича | 9 та компания бўйича

Банклардаги муаммоли кредитлар 5,9 трлн сўмга кўпайди

Йил бошидан NPL ҳажми 32,5 фоизга ошиб, 23,9 трлн сўмга етди. Шу даврда умумий кредит портфели атиги 6,7 фоизга ўсган. “Микрокредитбанк”нинг муаммоли кредитлари эса бир ойнинг ўзида 486 млрд сўмга кўпайиб, 2,28 трлн сўмга чиқди. Банк тизими бўйича | “Микрокредитбанк” бўйича

Пенсия ёшини уч йилга ошириш таклиф қилинди

Муҳокамага қўйилган лойиҳа 2028 йилдан пенсия ёшини ҳар йили уч ойга оширишни назарда тутади. Таклиф қабул қилинса, 2039 йилга келиб эркаклар 63, аёллар 58 ёшда пенсияга чиқади. Энг кам иш стажини ҳам 7 йилдан 15 йилгача узайтириш режалаштирилган. Батафсил

Hana Bank Ўзбекистон бозорига киришни режалаштирмоқда

Жанубий Кореянинг Hana Bank’и 2026 йил охиригача Ўзбекистонда ваколатхона очмоқчи. Ҳозирча гап тўлиқ тижорат банкини ташкил этиш ҳақида эмас. Батафсил

Педагоглар фарзандларига 30 фоизлик чегирма берилади

2026/2027 ўқув йилидан давлат ОТМларининг кундузги бакалавриатида ўқиётган педагоглар фарзандлари контракти 30 фоизга камайтирилади. Бир оиладаги бир нечта фарзанд талабларга мос келса, чегирма уларнинг ҳар бирига алоҳида қўлланилади. Батафсил

Давр Банк ва Капиталбанк рейтинглари оширилди

S&P Давр Банк рейтингини “B+”гача кўтарди. Бунга ABB томонидан банкнинг 51 фоиз акцияси 1,646 трлн сўмга сотиб олиниши таъсир қилди. Fitch ҳам Капиталбанк рейтингини “B+”гача оширди, бироқ кейин тижорий сабабларга кўра банкни рейтинглашни тўхтатди. Давр Банк | Капиталбанк

Жамшид Хайруллаев Tenge Bank бошқарув раиси биринчи ўринбосари этиб сайланди

Tenge Bank кузатув кенгаши Жамшид Хайруллаевни бошқарув раиси биринчи ўринбосари лавозимига сайлади. Тайинлов унинг номзоди Марказий банк билан келишилгандан кейин кучга киради. Хайруллаев бунга қадар Халқ банкининг Стратегия департаменти директори лавозимида ишлаб келаётган эди.

Ипотека-банк бошқарувини икки нафар раис ўринбосари тарк этмоқда

Ипотека-банк OTP Group бошқарувида бир вақтнинг ўзида икки топ-менежер Иракли Элашвили ва Максим Биков ўз лавозимини тарк этмоқда. Улар банкнинг корпоратив бизнес ва операцион йўналишларига раҳбарлик қилиб келган. Энди Биковнинг вазифалари Дмитрий Волчекка ўтказилади, Элашвили ўрнига эса янги раҳбар танлов асосида изланади. Батафсил

Блокланган банк карталари бўйича InfoCards ишга тушди

Эндиликда мижоз ўз картаси қайси орган томонидан, қачон ва нима сабабдан блокланганини хизмат кўрсатувчи банк орқали аниқлаши мумкин. Бунинг учун Марказий банкка алоҳида мурожаат қилиш талаб этилмайди. Батафсил

Халқаро пул ўтказмалари учун миллий платформа таклиф қилинди

Жанубий Кореядаги ватандошлар билан учрашувда барча банкларни ягона тизимга бирлаштирувчи платформа яратиш таклиф этилди. Президент ғояни Марказий банк билан бирга ишлаб чиқиш бўйича топшириқ берди. Батафсил

Икки банкка алоқадор шахс қидирувга берилди

ОАВ маълумотига кўра, ANORBANK Кузатув кенгаши аъзоси ва 49,4 фоиз акцияси эгаси Қаҳрамонжон Олимов халқаро қидирувга берилган. Ваколатли органлар бу ҳақда ҳозирча расмий маълумот бермаган.

Madad Invest Bank’нинг собиқ йирик акциядори Мўминжон Йўлдашевга нисбатан эса Интерпол Red Notice эълон қилган.

Қаҳрамонжон Олимов | Мўминжон Йўлдашев

Ҳафтанинг лонгриди

Pinkod 1995 йилдаги саёҳат чекларидан нақд пул тақчиллиги, 15–20 фоизлик “обнал” ва қора валюта бозори орқали бугунги мобил банкинггача бўлган 30 йиллик йўлни таҳлил қилди. Материални ўқиш