S&P Давр Банк рейтингини “B+”гача оширди — ABB битими банкка бир поғона қўшди
S&P Global Ratings Давр Банкнинг узоқ муддатли кредит рейтингини “B”дан “B+”гача оширди. Агентлик рейтингга бир поғона қўшилишини ABB томонидан банкнинг 51% акцияси сотиб олиниши ва янги акциядор томонидан ёрдам кўрсатилиши эҳтимоли билан боғлади.
S&P Global Ratings Давр Банкнинг узоқ муддатли кредит рейтингини “B”дан “B+”гача оширди, қисқа муддатли рейтингини эса “B” даражасида тасдиқлади. Рейтинг бўйича прогноз “Барқарор” этиб белгиланди.
Шунингдек, банк “CreditWatch Positive” рўйхатидан чиқарилди. S&P Давр Банкни ушбу рўйхатга жорий йилнинг 15 майида, ABB томонидан назорат пакети сотиб олиниши кутилаётган бир пайтда киритганди.
10 сентябрь куни Озарбайжоннинг ABB банки Давр Банкнинг 51% акциясини сотиб олиш бўйича битимни якунлади. Назорат пакети 1,646 трлн сўмга — қарийб 140 млн долларга баҳоланган.
S&P Давр Банкни ABB гуруҳи учун “ўртача стратегик аҳамиятга эга” шўъба сифатида баҳоламоқда. Ўзбекистон банки ABB гуруҳи жами активларининг тахминан 10–12%ини ташкил этади.
Агентликка кўра, ABB гуруҳининг кредитга лаёқатлилиги Давр Банкнинг мустақил кредит профилидан юқори. Зарурат туғилганда бош компания банкка фавқулодда ёрдам кўрсатиши мумкинлиги ҳисобга олиниб, Давр Банк рейтингига бир поғона қўшимча баҳо берилган.
S&P ҳисоб-китобларига кўра, Давр Банкнинг кредит портфели 2026 йилда 20–25%га, 2027–2028 йилларда эса йилига 30–35%га ўсиши мумкин. Банкнинг асосий йўналишлари чакана кредитлаш ҳамда кичик ва ўрта бизнесни молиялаштириш бўлиб қолиши кутилмоқда.
Шу билан бирга, агентлик банкнинг соф фоиз маржаси 2026–2028 йилларда 10–10,3% атрофида сақланишини прогноз қилмоқда. Базавий сценарийда ушбу даврда ABB томонидан Давр Банк капиталига қўшимча маблағ киритилиши назарда тутилмаган.
ABB гуруҳига қўшилиш Давр Банкка Ўзбекистонда Озарбайжон ва Туркия капитали иштирокидаги компанияларга хизмат кўрсатиш ҳамда ABBнинг халқаро пул ўтказмалари хизматларини интеграция қилиш имконини бериши кутилмоқда.
Айни пайтда S&P икки банк ўртасидаги операцион интеграция даражаси ҳали тўлиқ шаклланмаганини қайд этган. Давр Банк келгусида “ABB Davr-Bank” номи остида фаолият юритиши режалаштирилмоқда.
“Барқарор” прогноз Давр Банк яқин 12 ойда етарли капитал ва активлар сифатини сақлаб қолиши ҳақидаги S&P кутишларини акс эттиради. Агентлик яқин 6–12 ой ичида рейтингнинг яна оширилишини ҳозирча кам эҳтимолли деб баҳоламоқда.
