Ўзбекистонда жисмоний шахслар кредитлари бўйича ўртача фоиз ставка кетма-кет учинчи ой ошмоқда
Марказий банк маълумотига кўра, апрель ойида 22,6 фоиз бўлган ставка июль ойига келиб 23,8 фоизга етган.
Ўзбекистонда жисмоний шахсларга миллий валютада ажратиладиган кредитлар бўйича ўртача фоиз ставкаси кетма-кет учинчи ой давомида ўсишда давом этмоқда. Бу ҳақда Марказий банк эълон қилган инфографикада келтирилган.
МБга кўра, кредит ставкалари апрель ойида йиллик диапазондаги энг паст — 22,6 фоиз даражасида қайд этилган. Шундан сўнг ўртача фоиз май ойида 23,1 фоизга, июнь ойида 23,7 фоизга, июль ойига келиб эса 23,8 фоизга етди.
Мазкур жараён банклардаги омонатлар бўйича фоиз ставкани 23 фоиздан ошмайдиган қилиб тушириш орқали кредит фоизларини пасайтириш кутилган натижани бермаганини кўрсатади.
Ҳозирда Ўзбекистонда фақат Анорбанк 23 фоизлик омонат таклиф қилмоқда. Қолган банкларда эса максимал ставка 22 фоиз даражасида сақланиб қолмоқда.
Эслатиб ўтамиз, жорий йил апрель ойида мамлакат банклари омонатлар бўйича фоиз ставкаларини синхрон тарзда пасайтирган эди. Ўшанда бу қарор бозор тамойилларидан кўра маъмурий аралашув сифатида талқин қилинган.
Шунга қарамай, йиллик солиштирма ҳисобда жисмоний шахслар кредитлари бўйича ўртача фоиз ставкаси ўтган йилнинг шу даврига нисбатан 0,4 фоиз пастроқ.
Айни пайтда тадбиркорлик субъектларига ажратилаётган миллий валютадаги кредитлар бўйича ўртача ставка эса бироз пасайиб, 22,7 фоизни ташкил этган.
