Ўзбекистон август ойида 2 тонна олтин харид қилди — Жаҳон олтин кенгаши

Ўзбекистон август ойида олтин импортини амалга оширди. Жаҳон олтин кенгаши маълумотларига кўра, мамлакат бир ой давомида 2 тонна олтин харид қилган.

Август ойида олтин импорти кузатилганига қарамай, Ўзбекистон жаҳон миқёсида энг йирик олтин экспортёрларидан бири бўлиб қолмоқда. Йил бошидан буён мамлакатнинг олтин захиралари 17 тоннага камайган.

Шунга қарамай, жаҳон бозорида олтин нархининг рекорд даражада ошгани сабабли Ўзбекистоннинг олтин-валюта захиралари август ойида илк бор 50 млрддан ошди.

Бошқа давлатларнинг олтин харидлари

• Қозоғистон Миллий банки август ойида 8 тонна олтин харид қилиб, бу кетма-кет олтинчи ойда амалга оширилган харид бўлди. Мамлакатнинг олтин захиралари ҳозирда 316 тоннага етиб, 2024 йил охирига нисбатан 32 тоннага кўпайди.
• Болгария Миллий банки 2 тонна олтин сотиб олиб, 1997 йил июнидан бери энг йирик ойлик харидни амалга оширди (ўшанда 8 тонна харид қилинган эди). Эндиликда мамлакатнинг олтин захиралари 43 тоннага етди.
• Туркия Марказий банки халқаро захираларига яна 2 тонна олтин қўшди. Шу тариқа йил бошидан бери мамлакатнинг расмий олтин захиралари 21 тоннага ошиб, 639 тоннага етди.
• Хитой Халқ банки ҳам 2 тонна олтин харид қилди — бу кетма-кет ўнинчи ойда амалга оширилган харид ҳисобланади. Эндиликда Хитойнинг олтин захиралари 2300 тоннадан ошган бўлса-да, бу кўрсаткич мамлакатнинг умумий халқаро захираларининг атиги 7 фоизини ташкил этади.
• Россия (3 тонна) ва Индонезия (2 тонна) марказий банклари эса август ойида олтин сотган ягона марказий банклар бўлди.

Ўзбекистоннинг экспорт кўрсаткичлари

2025 йилнинг январь–август ойларида Ўзбекистоннинг олтин экспорти ҳажми 8,42 млрдга етди. Бу ўтган йилнинг шу даврига нисбатан қарийб 69 фоизга кўп бўлиб, 2023 йилда қайд этилган тарихий максимум — 8,15 миллиард доллар кўрсаткичидан ҳам ошди.