Ўзбекистоннинг олтин-валюта захиралари бир ойда 7,8 млрд долларга ошди
Ўзбекистоннинг расмий захира активлари 1-сентабр ҳолатига 72,13 млрд долларга етди.
Бу ўтган йилнинг мос даврига нисбатан 44 фоиз кўп бўлиб, ўсиш асосан олтин нархининг қимматлашиши ҳисобига юз берди.
Айни пайтда хорижий валютадаги захиралар бир ойда 1 млрд долларга камайди.
Марказий банк маълумотларига кўра, Ўзбекистоннинг расмий захира активлари августда 64,3 млрд доллардан 72,1 млрд долларга етган. Бир ой ичидаги ўсиш 7,8 млрд долларни ташкил этди.
Захираларнинг асосий қисмини монетар олтин ташкил қилмоқда. Унинг қиймати бир ойда 56,1 млрд доллардан 64,9 млрд долларга ошди. Бу 8,8 млрд доллар ёки 15,7 фоизлик ўсиш демакдир.
Натижада олтиннинг жами халқаро захиралардаги улуши 87,2 фоиздан 90 фоизгача кўтарилди.
Марказий банк изоҳига кўра, август ойида олтиннинг ҳисоб-китоб нархи бир трой унция учун 4 052,2 доллардан 4 602 долларгача кўтарилган. Фақат нарх ўзгаришининг ўзи захиралар қийматига қарийб 7,8 млрд доллар қўшган.
| Кўрсаткичлар | 1 сентябрь 2025 | 1 январь 2026 | 1 август 2026 | 1 сентябрь 2026 |
|---|---|---|---|---|
| Расмий захира активлари | $50,09 млрд | $66,31 млрд | $64,35 млрд | $72,13 млрд |
| Олтин | $40,07 млрд | $55,09 млрд | $56,12 млрд | $64,93 млрд |
| Олтиннинг соф ҳажми | 11,76 млн трой унцияси | 12,55 млн трой унцияси | 13,85 млн трой унцияси | 14,11 млн трой унцияси |
| Хорижий валютадаги захира активлари | $9,45 млрд | $10,64 млрд | $7,65 млрд | $6,64 млрд |
Шу билан бирга, олтиннинг жисмоний ҳажми ҳам ошган. Марказий банк тасарруфидаги монетар олтин миқдори 13,85 млн трой унциядан 14,11 млн трой унцияга етган. Ўсиш қарийб 259 минг трой унция ёки 1,9 фоизни ташкил этган.
Бироқ хорижий валютадаги захира активлари камайишда давом этди. Уларнинг ҳажми август давомида 7,65 млрд доллардан 6,64 млрд долларга тушди. Бир ойда пасайиш 1,02 млрд доллар ёки 13,3 фоизни ташкил этди.
Хорижий валютадаги нақд маблағ ва депозитлар 5,89 млрд доллардан 4,87 млрд долларгача камайган. Қимматли қоғозлар ҳажми эса деярли ўзгармай, 1,77 млрд доллар атрофида қолган.
Йил бошидан буён Ўзбекистоннинг халқаро захиралари 10,9 млрд долларга ёки 17,8 фоизга кўпайди. 2026 йил 1 январь ҳолатида уларнинг ҳажми 61,2 млрд доллар эди.
Ўтган йилнинг мос даври билан таққослаганда ўсиш янада юқори. 2025 йил 1-сентабрда захиралар 50,1 млрд долларни ташкил қилган эди. Бир йил ичида уларнинг қиймати 22 млрд долларга ёки 44 фоизга ошган.
