Ўзбекистон 2025 йилнинг саккиз ойида рекорд даражада олтин экспорт қилди — $8,4 млрд
2025 йилнинг январь–август ойларида Ўзбекистон олтин экспорти $8,42 млрдга етиб, 2023 йилги $8,15 млрдлик рекорд кўрсаткични ортда қолдирди. Август ойида мамлакат $836 млн қийматдаги олтин сотган.
Ўзбекистон 2025 йилнинг дастлабки саккиз ойида тарихий рекорд даражада олтин экспорт қилди. Бу ҳақда Миллий статистика қўмитаси ҳисоботида маълум қилинди.
Июндаги қисқа танаффусдан кейин мамлакат июль ва август ойларида олтин экспортини давом эттирди. Августда олтин экспорти ҳажми $836 млнни ташкил этди.
Йил бошидан буён олтин экспорти қуйидагича бўлди:
- февраль — $1,73 млрд,
- март — $1,84 млрд,
- апрель — $1,91 млрд,
- май — $1,01 млрд,
- июль — $1,09 млрд.
Умуман олганда, январь–август ойларида олтин экспорти $8,42 млрдга етди. Бу ўтган йилнинг шу даврига нисбатан қарийб 69 фоизга кўпдир. Шу тариқа 2023 йилда қайд этилган тарихий максимум — $8,15 млрд ҳам ортда қолди.
Қўмита олтиннинг жисмоний ҳажми ҳақида маълумот бермаган. Бироқ рекорд экспортнинг асосий сабаби сифатида жаҳон бозорларида қимматбаҳо металл нархининг кескин ошишини келтириш мумкин.
Ўзбекистон июнь ойида тўрт ой кетма-кет сотувдан сўнг олтин харид қилишга ўтган эди. Шу ойда жаҳон марказий банклари ўз олтин захираларини жами 22 тоннага оширган бўлса, шундан 9 тоннаси Ўзбекистон ҳиссасига тўғри келган. Эътиборлиси, бунга қадар мамлакат кетма-кет тўрт ой давомида олтин сотувчиси бўлиб келган эди.
Август ойида олтин-валюта захиралари ҳам тарихий даражада ошди. Халқаро активлар $1,34 млрдга кўпайиб, илк бор $50 млрддан юқори натижага эришди.
Аввалроқ Pinkod Навоий конь-металлургия комбинати биринчи ярим йилликда $1,5 млрд соф фойда олгани ҳақида ёзган эди.
Бу ўтган йилнинг шу даврига нисбатан 633 млн долларга ёки 71,8 фоизга кўпдир. Мазкур натижа жаҳон бозорида олтин нархининг 2025 йилда кетма-кет рекорд даражага чиқиши билан боғламоқда.
