Ўзбекистон 9 ойда қарийб $10 млрдлик олтин сотди
Ўзбекистон 2025 йилнинг январь–сентябрь ойларида 9,89 миллиард долларлик олтин экспортини амалга оширди. Бу ўтган йилнинг мос даврига нисбатан 70,9 фоизга кўп бўлиб, мамлакат тарихидаги энг юқори кўрсаткич ҳисобланади. Экспорт ҳажмининг ошиши жаҳон бозорида олтин нархларининг кескин кўтарилиши билан боғлиқ.
Ўзбекистон 2025 йилнинг январь–сентябрь ойларида қарийб 10 млрд долларлик олтин экспортини амалга оширди. Бу ҳақда Миллий статистика қўмитаси маълумотларида қайд этилган.
Фақатгина сентябрь ойининг ўзида олтин экспорти ҳажми 1,47 млрд долларни ташкил қилган. Аввалги ойлар бўйича кўрсаткичлар қуйидагича:
- Февралда — 1,73 млрд
- Мартда — 1,84 млрд
- Апрелда — 1,91 млрд
- Майда — 1,01 млрд
- Июлда — 1,09 млрд
- Августда — 836 млн доллар.
Учинчи чорак якунларига кўра, умумий экспорт ҳажми 9,89 млрд доллар бўлиб, бу ўтган йилнинг мос даврига нисбатан 70,9 фоизга юқори. Шуни таъкидлаш жоизки, август ойидаёқ Ўзбекистон олтин экспорти барча йиллардаги йиллик кўрсаткичлардан ошиб кетган эди.
Давом этаётган рекорд кўрсаткичлар жаҳон бозорида олтин нархининг сезиларли ошиши билан изоҳланади. Масалан, 20 октябрда олтин нархи 4 381 долларгача кўтарилган, бироқ кейинчалик 4 030 долларгача пасайган.
Жаҳон олтин кенгаши (WGC) маълумотига кўра, Ўзбекистоннинг олтин захиралари йил бошига нисбатан 17 тоннага камайган. Шунга қарамай, халқаро заҳиралар ҳажми олтин нархларининг ошиши ҳисобига ўсишда давом этмоқда — сентябрь ойида у илк бор 55 млрд долларга яқинлашди.
