Oltin quymalari narxi yana rekord darajaga yetdi
Hozirda banklarda 5 grammli oltin quyma 6 mln 426 ming soʻmdan sotilmoqda.
Oʻzbekistonda oltin quymalarining narxi yana bir bor tarixiy maksimumni yangiladi. Markaziy bank maʼlumotiga koʻra, 17 mart kuni 1 gramm oltinning narxi ilk bor 1 mln 285 ming 280 soʻmga yetdi. Shuningdek, 5 grammli oltin quymaning narxi ilk marotaba 6,4 mln soʻmdan oshdi.
Joriy oltin quymalari narxlari:
- 5 gramm — 6 mln 426 ming soʻm
- 10 gramm — 12 mln 853 ming soʻm
- 20 gramm — 25 mln 706 ming soʻm
- 50 gramm — 64 mln 264 ming soʻm
- 100 gramm — 128 mln 528 ming soʻm
Banklarning manzillari va batafsil maʼlumotlarni Markaziy bank rasmiy saytidan topish mumkin.
Maʼlumot uchun, 14 mart kuni jahon bozoridagi oltin narxi bir unsiya uchun ilk marotaba 3 000 dollarga koʻtarilgan edi.
Ushbu oʻsishning asosiy sababi global miqyosda davom etayotgan savdo urushlari va geosiyosiy noaniqliklar bilan bogʻliq. Bunday noaniqlik sharoitida oltin eng xavfsiz investitsiya vositalaridan biri sifatida qaraladi, bu esa uning narxining oshishiga sabab boʻlmoqda.
Dunyo moliyaviy institutlari oltin narxining bundan ham yuqoriga koʻtarilishini kutmoqda. Xususan, Macquarie Group tahlilchilarining fikriga koʻra, 2025 yilning uchinchi choragida oltin narxi $3 500 ga yetishi mumkin.
