Oʻzbekistonning oltin-valyuta zaxiralari bir oyda 5,5 mlrd dollarga kamaydi
Oʻzbekistonning rasmiy zaxira aktivlari 1 oktabr holatiga 66,59 mlrd dollarni tashkil etdi. Bu bir oy oldingiga nisbatan 7,7 foiz kam boʻlib, pasayish asosan oltin narxining arzonlashishi hisobiga yuz berdi. Ayni paytda zaxiralardagi oltinning jismoniy hajmi oshishda davom etgan.
Markaziy bank maʼlumotlariga koʻra, Oʻzbekistonning rasmiy zaxira aktivlari sentabrda 72,13 mlrd dollardan 66,59 mlrd dollarga tushgan. Bir oy ichidagi pasayish 5,55 mlrd dollarni tashkil etdi.
Zaxiralarning asosiy qismini monetar oltin tashkil qilmoqda. Uning qiymati bir oyda 64,93 mlrd dollardan 60,09 mlrd dollarga kamaydi. Bu 4,84 mlrd dollar yoki 7,5 foizlik pasayish demakdir.
Natijada oltinning jami xalqaro zaxiralardagi ulushi 90 foizdan 90,2 foizga koʻtarildi.
Biroq oltinning jismoniy hajmi aksincha oshgan. Markaziy bank tasarrufidagi monetar oltin miqdori 14,11 mln troy unsiyadan 14,34 mln troy unsiyaga yetgan. Bu qariyb 7,2 tonnalik oʻsishni anglatadi.
Shunday qilib, oltin zaxiralarining dollar hisobidagi qiymati kamayishi uning jismoniy hajmi qisqarishi bilan emas, balki jahon bozoridagi narxining pasayishi bilan bogʻliq.
| Koʻrsatkichlar | 1 yanvar 2026 | 1 sentabr 2026 | 1 oktabr 2026 |
|---|---|---|---|
| Rasmiy zaxira aktivlari | $66,31 mlrd | $72,13 mlrd | $66,59 mlrd |
| Oltin | $55,09 mlrd | $64,93 mlrd | $60,09 mlrd |
| Oltinning sof hajmi | 12,55 mln unsiya | 14,11 mln unsiya | 14,34 mln unsiya |
| Xorijiy valyutadagi zaxiralar | $10,64 mlrd | $6,64 mlrd | $5,93 mlrd |
Shu bilan birga, xorijiy valyutadagi zaxira aktivlari ham kamayishda davom etdi. Ularning hajmi sentabr davomida 6,64 mlrd dollardan 5,93 mlrd dollarga tushdi. Bir oyda pasayish qariyb 703 mln dollar yoki 10,6 foizni tashkil etdi.
Yil boshidan buyon Oʻzbekistonning xalqaro zaxiralari 66,31 mlrd dollardan 66,59 mlrd dollarga oshgan. Yaʼni toʻqqiz oy yakunida oʻsish qariyb 280 mln dollar yoki 0,4 foizni tashkil qilmoqda.
Biroq shu davrda xorijiy valyutadagi zaxiralar 10,64 mlrd dollardan 5,93 mlrd dollargacha qisqargan. Bu yil boshiga nisbatan qariyb 4,7 mlrd dollar yoki 44 foizlik pasayish demakdir.
Oʻzbekiston xalqaro zaxiralarining 90 foizdan ortigʻi oltin hissasiga toʻgʻri kelayotgani sabab jahon bozorida qimmatbaho metall narxining oʻzgarishi zaxiralarning umumiy qiymatiga sezilarli taʼsir koʻrsatmoqda.
