Paynet’га тегишли компания GoInvest’ни сотиб олмоқда
Paynet’нинг шўба корхонаси Furtherit МЧЖ GoInvest’нинг назорат пакетини сотиб олмоқда.
Очиқ реестрда Furtherit ҳозирча 33,14 фоиз улуш билан компаниянинг энг йирик таъсисчиси сифатида кўрсатилган.
Бироқ GoInvest’га алоқадор шахсларга кўра, улушлар тақсимоти яна ўзгарган ва битим тафсилотлари тез орада расмий релизда очиқланади.
Бу ҳақда биринчи бўлиб иқтисодчи Тимурмалик Элмурадов ўзининг Telegram каналида хабар берди.
GoInvest’га алоқадор шахслар Pinkod.uz билан суҳбатда битим юзасидан тез орада расмий релиз эълон қилинишини маълум қилди. KAP DEPO’нинг Telegram гуруҳида фойдаланувчиларга берилган изоҳда ҳам очиқ маълумотлар базасида кўрсатилган улушлар якуний ҳолатни акс эттирмаслиги, таъсисчилар таркибида кейинги ўзгаришлар бўлгани айтилган.
2026 йил 17 август соат 12:20 ҳолатига GoInvest МЧЖ устав капиталидаги улушлар қуйидагича тақсимланган:
- Furtherit МЧЖ — 33,14 фоиз;
- Kapital-Depozit МЧЖ — 29 фоиз;
- Фаррух Ходжаев — 21,14 фоиз;
- Бахром Абдукадиров — 10,03 фоиз;
- Жасурбек Ўролбоев — 6,69 фоиз.
Ушбу таркиб бўйича Furtherit GoInvest’нинг энг йирик алоҳида улушдорига айланган. Бироқ 33,14 фоизнинг ўзи 50 фоиздан ортиқ назорат пакети ҳисобланмайди. Компания вакилларининг билдиришича, реестрдаги бу ҳолатдан кейин улушлар таркибида яна ўзгариш бўлган. Битим якунлангач, Furtherit’нинг улуши назоратни таъминлайдиган даражага етиши кутилмоқда.
Таққослаш учун, 2026 йил бошидаги маълумотларда GoInvest’нинг 70 фоизи Kapital-Depozit’га, 20 фоизи Бахром Абдукадировга ва 10 фоизи Жасурбек Ўролбоевга тегишли эди. Ҳозирги очиқ маълумотларда Kapital-Depozit улуши 41 фоиз пунктга камайган, таъсисчилар таркибига эса Furtherit ва Фаррух Ходжаев кирган.
Корпоратив ўзгаришлар GoInvest капиталининг кескин оширилиши билан бир вақтда юз берган. Компаниялар ҳақидаги маълумотлар базасига кўра, унинг устав капитали аввалги 1 млрд сўмдан 14,23 млрд сўмгача, яъни 14 баробардан кўпроққа ошган. GoInvest 2026 йил 22 июлда қайта рўйхатдан ўтказилган.
Ҳозирча Paynet томони GoInvest учун қанча тўлаётгани, битим айнан қайси таъсисчиларнинг улушларини қамраб олиши ва Furtherit якунда компаниянинг неча фоизига эгалик қилиши очиқланмаган.
Битим тарафлари ҳақида
Furtherit 2023 йил октябрда рўйхатдан ўтган дастурий таъминот компанияси бўлиб, унинг 100 фоиз улуши Paynet’га тегишли. Корхона IT Park резиденти ҳисобланади.
GoInvest эса Ўзбекистон фонд бозоридаги акциялар ва облигациялар билан савдо қилиш учун мўлжалланган инвестиция иловаси. Унда брокерлик ҳисобварағини масофадан очиш, ҳисобни тўлдириш, инвестиция портфелини кузатиш ҳамда қимматли қоғозларни сотиб олиш ва сотиш мумкин.
Илованинг ўзи брокер вазифасини бажармайди. Ундаги инвестиция воситачилиги хизматлари тегишли лицензияларга эга Kapital-Depozit — KAP DEPO орқали кўрсатилади. Компания маълумотига кўра, GoInvest 2024 йилда чакана инвесторларнинг фонд бозорига киришини соддалаштириш мақсадида ишга туширилган.
GoInvest’нинг Paynet экотизимига қўшилиши тўлов сервисининг инвестиция хизматлари бозорига киришини англатиши мумкин. Бироқ платформанинг Paynet иловаси билан интеграцияси, KAP DEPO билан брокерлик ҳамкорлиги ва янги таъсисчилар таркиби расмий релиздан кейин аниқ бўлади.
