Ўзбекистонда иқтисодий фаол аҳолининг 33 фоизи камида битта банк кредитига эга
Шунингдек, 2020 йилдан 2025 йилгача бўлган беш йиллик даврда 3 та ва ундан ортиқ кредитга эга бўлган фуқаролар улуши 5 фоиздан 11 фоизгача ошган.
Марказий банк тақдим этган маълумотга кўра, Ўзбекистонда иқтисодий фаол аҳолининг 33 фоизи, яъни қарийб 5 миллион киши камида битта банк кредитига эга.
Шунингдек, кредит олувчиларнинг қарийб 27 фоизи, яъни 1,4 миллион нафари 2 та ёки ундан ортиқ кредитга эга.
Бу кўрсаткич 2020 йилга нисбатан сезиларли ўсишни кўрсатмоқда. Масалан, 2020 йил бошида 3 та ёки ундан ортиқ кредитга эга бўлганлар улуши атиги 5 фоиз бўлган бўлса, 2025 йилнинг июнига келиб бу рақам 11 фоизга етган.
2 та кредитга эга бўлган фуқаролар улуши эса шу давр мобайнида 13 фоиздан 16 фоизгача ўсган.
Бу ўзгаришлар аҳолининг кредит маблағларидан кўпроқ фойдаланаётганини англатади.
Яна бир муҳим жиҳат — кредитлар сонининг йилдан-йилга қандай ўзгараётганидир.
2020 йилда 1 та кредитга эга бўлганлар улуши 82 фоиз бўлган бўлса, бу кўрсаткич 2025 йилнинг июнида 73 фоизгача камайган. Яъни, битта кредит билан кифояланаётганлар сони пасайган, бир нечта кредитга эга фуқаролар эса кўпайган.
