Ўзбекистон май ойида $1 млрдлик олтин экспорт қилди
Бу ҳолат олтин нархининг рекорд даражада кўтарилиши билан боғлиқ. Маълумот учун, мамлакат халқаро захиралари таркибидаги олтиннинг физик ҳажми кетма-кет тўртинчи ойда ҳам камайган.
2025 йилнинг январь-май ойларида Ўзбекистоннинг ташқи савдо айланмаси $31,3 млрдни ташкил этди. Бу ҳақда Миллий статистика қўмитаси хабар берди.
Бу кўрсаткич ўтган йилнинг шу даврига нисбатан 15 фоизга кўпдир.
Ташқи савдо таркибида экспорт ҳажми $14,8 млрдни (+31,1 фоиз), импорт ҳажми эса $16,5 млрдни (+3,7 фоиз) ташкил этди.
Экспортдаги бундай ўсиш асосан олтин сотуви ҳисобига юзага келмоқда. Жумладан, Ўзбекистон май ойида $1 млрдлик олтин сотган. 2025 йил бошидан бери эса олтин экспорти $6,6 млрдга етган бўлиб, бу 2024 йилнинг шу даврига нисбатан 56,9 фоизга кўпроқдир.
Ўзбекистон Жаҳон олтин кенгашининг сўнгги учта ҳисоботида олтин экспорти бўйича етакчи мамлакат сифатида қайд этилган. Хусусан, февраль ойида 12 тонна олтин сотиб, Қозоғистондан (8 тонна) ўзиб кетган ва жаҳонда энг йирик экспортчи бўлган. Март ойида эса 11 тонна олтин экспорт қилиниб, бу позиция сақлаб қолинган.
Апрель ойида экспорт қилинган олтиннинг қиймати 1,91 миллиард долларга тенг бўлган. Бу ойда ҳам мамлакат 11 тонна олтин экспорт қилган.
Аввалроқ, Ўзбекистон халқаро олтин-валюта захиралари май ойида ҳам ўсишда давом этгани хабар қилинган эди. Шунга қарамасдан, захиралар таркибидаги олтиннинг физик ҳажми кетма-кет тўртинчи ой камайган.
