Олтин қуймалари нархи яна рекорд даражага етди
Ҳозирда банкларда 5 граммли олтин қуйма 6 млн 426 минг сўмдан сотилмоқда.
Ўзбекистонда олтин қуймаларининг нархи яна бир бор тарихий максимумни янгилади. Марказий банк маълумотига кўра, 17 март куни 1 грамм олтиннинг нархи илк бор 1 млн 285 минг 280 сўмга етди. Шунингдек, 5 граммли олтин қуйманинг нархи илк маротаба 6,4 млн сўмдан ошди.
Жорий олтин қуймалари нархлари:
- 5 грамм — 6 млн 426 минг сўм
- 10 грамм — 12 млн 853 минг сўм
- 20 грамм — 25 млн 706 минг сўм
- 50 грамм — 64 млн 264 минг сўм
- 100 грамм — 128 млн 528 минг сўм
Банкларнинг манзиллари ва батафсил маълумотларни Марказий банк расмий сайтидан топиш мумкин.
Маълумот учун, 14 март куни жаҳон бозоридаги олтин нархи бир унция учун илк маротаба 3 000 долларга кўтарилган эди.
Ушбу ўсишнинг асосий сабаби глобал миқёсда давом этаётган савдо урушлари ва геосиёсий ноаниқликлар билан боғлиқ. Бундай ноаниқлик шароитида олтин энг хавфсиз инвестиция воситаларидан бири сифатида қаралади, бу эса унинг нархининг ошишига сабаб бўлмоқда.
Дунё молиявий институтлари олтин нархининг бундан ҳам юқорига кўтарилишини кутмоқда. Хусусан, Macquarie Group таҳлилчиларининг фикрига кўра, 2025 йилнинг учинчи чорагида олтин нархи $3 500 га етиши мумкин.
