Ilon Mask dunyodagi eng boy odam unvonini Oracle kompaniyasi hammuassisi Larri Ellisonga boy berdi.

Bloomberg Billionaires Index maʼlumotlariga koʻra, Oracle Corp.ning chorak yakunlari kutilganidan yuqori boʻlgani hamda kelgusida oʻsish davom etishi eʼlon qilingach, Ellisonning boyligi bir kunda 101 milliard dollarga oshdi.

Bu oʻsish uning umumiy boyligini 393 milliard dollarga yetkazdi. Ilon Mask esa 385 milliard dollar bilan ikkinchi oʻrinni egallab turibdi. Bu Bloomberg indeksida qayd etilgan eng katta bir kunlik oʻsish hisoblanadi.

Mask ilk bor 2021 yilda dunyodagi eng boy odamga aylangandi, biroq keyinchalik Amazon asoschisi Jeff Bezos va LVMH rahbari Bernard Arno foydasiga yetakchilikni qoʻldan boy bergan. Oʻtgan yili esa u yana peshqadamlikni qaytarib olib, qariyb bir yil davomida uni saqlab turgandi.

81 yoshli Ellison Oracel'ni hammuassis sifatida tashkil etgan boʻlib, hozirda kompaniya raisi va texnologiyalar boʻyicha direktori hisoblanadi. Uning boyligining asosiy qismi aynan shu dasturiy taʼminot kompaniyasi bilan bogʻliq.

Mavzuga doir: Larri Ellison qanday qilib dunyoning ikkinchi eng boy odamiga aylandi?

Oracle aksiyalari joriy yil boshidan buyon 45% ga oshgan boʻlsa, chorshanba kuni kompaniya buyurtmalarining keskin koʻpayishi va bulutli infratuzilma boʻyicha agressiv prognozidan keyin yana 41% ga koʻtarildi. Bu kompaniya tarixidagi eng yirik bir kunlik oʻsish boʻldi.

Ayni paytda Tesla aksiyalari yil boshidan beri 13 foizga pasaygan.

Avvalroq Pinkod Tesla direktorlar kengashi Ilon Maskka 2035 yilgacha qiymati 1 trillion dollarga teng mukofot paketi toʻlash ehtimoli haqida yozgan edi.

Toʻliq paketni qoʻlga kiritishi uchun Mask 10 yil ichida kompaniya qiymatini 1,1 trillion dollardan 8,5 trillion dollargacha oshirishi, shuningdek foydani 17 milliard dollardan 400 milliard dollargacha koʻtarishi kerak boʻladi.

Yangilanish: 11 sentabr 9:00 holatiga koʻra Ilon Mask yana birinchi oʻringa chiqib oldi.

Oracle asoschisi Larri Ellison Ilon Maskni ortda qoldirib, dunyoning eng boy odamiga aylandi