Ilon Mask tarixda ilk bor boyligi $800 mlrddan oshgan odamga aylandi
Forbes hisob-kitoblariga koʻra, SpaceX va xAI birlashuvidan soʻng Ilon Mask tarixda ilk bor boyligi $800 milliarddan oshgan inson boʻldi.
Tesla va SpaceX asoschisi, amerikalik tadbirkor Ilon Mask tarixda birinchi boʻlib boyligi $800 milliarddan oshgan inson sifatida qayd etildi. Bu haqda Forbes nashri xabar berdi.
Mazkur rekord natija SpaceX’ning Ilon Maskga tegishli sunʼiy intellekt kompaniyasi — xAI’ni sotib olishi ortidan yuzaga keldi. Bitim natijasida kosmik texnologiyalar giganti va sunʼiy intellekt yoʻnalishidagi biznes birlashdi.
Forbes hisob-kitoblariga koʻra, SpaceX va xAI qoʻshilgach, yangi kompaniya $1,25 trillionga baholandi. Ushbu kelishuv Mask boyligini qariyb $84 milliardga oshirib, uning sof aktivlari qiymatini $852 milliardga yetkazdi.
Roʻyxatda ikkinchi oʻrinni yirik farq bilan Google hammuassisi Larri Peyj $277,9 mlrd boylik bilan egallab turibdi. Kuchli uchlikni yana bir Google hammuassisi Sergey Brin $256,3 mlrd bilan yakunladi.
Bitimdan avval Ilon Mask SpaceX kompaniyasining 42 foiz ulushiga ega edi. Dekabr oyidagi baholashlarga koʻra, SpaceXʼning umumiy qiymati $800 milliard boʻlib, Mask ulushi $336 milliardni tashkil etgan. Shuningdek, u xAI kompaniyasining 49 foiziga egalik qilgan boʻlib, bu ulush $122 milliardga baholangan.
Birlashuvdan soʻng SpaceX $1 trillion, xAI esa $250 milliard qiymat bilan baholandi.
22 dekabrda Maskning boyligi birinchi marta $700 mlrddan oshgandi, 16 dekabrda esa u birinchi marta $600 mlrdlik marrani zabt etgandi.
