Ilon Mask tarixdagi ilk trillionerga aylandi
SpaceX’ning rekord darajadagi IPOsidan keyin Ilon Maskning boyligi $1,1 trlndan oshib, u tarixdagi birinchi trillionerga aylandi. Kompaniya joylashtirish orqali $75 mlrd jalb qildi va uning bozor qiymati qariyb $1,77 trlnga yetdi.
Amerikalik tadbirkor Ilon Mask Forbes va Reuters hisob-kitoblariga koʻra, tarixdagi ilk trillionerga aylandi. Bunga SpaceX kompaniyasining rekord miqdordagi aksiyalarni birlamchi ommaviy joylashtirishi sabab boʻldi.
SpaceX IPO doirasida 555,6 mln dona aksiyani har biri $135 dan sotib, $75 mlrd jalb qildi. Natijada kompaniyaning umumiy qiymati qariyb $1,77 trln deb baholandi. Bu jalb qilingan mablagʻ hajmi boʻyicha AQSh fond bozori tarixidagi eng yirik IPO boʻldi.
Reuters va Forbes hisob-kitoblariga koʻra, IPOdan keyin Maskning SpaceX’dagi aksiyalari va opsionlari qiymati qariyb $866 mlrdga yetdi. Tesla hamda boshqa kompaniyalardagi aktivlari bilan birga uning umumiy boyligi SpaceX aksiyalari savdosi boshlangach, $1,1 trlndan oshdi.
Biroq bu mablagʻ Maskning bank hisobidagi naqd pul emas. Uning boyligi asosan kompaniyalardagi aksiyalar va ularga egalik qilish huquqini beruvchi opsionlarning joriy bozor qiymatidan iborat. Shu sababli SpaceX yoki Tesla aksiyalari arzonlashsa, Maskning hisoblangan boyligi ham keskin kamayishi mumkin.
IPO toʻliq yangi aksiyalar chiqarish orqali amalga oshirildi. Yaʼni amaldagi aksiyadorlar joylashtirish davomida oʻz ulushlarini sotmadi va jalb qilingan mablagʻlarning barchasi SpaceX hisobiga tushadi. Kompaniya kapitalni Starlink sunʼiy yoʻldosh tarmogʻi, kosmik loyihalar hamda sunʼiy intellekt infratuzilmasini rivojlantirishga yoʻnaltirishi kutilmoqda.
Turli reytinglarda turlicha natija
Milliarderlar boyligini hisoblash usullari bir-biridan farq qiladi. Forbes Maskka tegishli ayrim aksiyalar va opsionlarni ham hisobga olib, uning boyligi $1,1 trlndan oshganini qayd etmoqda.
Bloomberg Billionaires Index esa asosan Maskning hozirgi ulushlarini hisobga olib, uning boyligini $971 mlrdga baholagan. Bloomberg hisobiga koʻra, Mask shartli opsionlarsiz ham trillionerga aylanishi uchun SpaceX aksiyalari narxi $135 dan kamida $140,71 gacha koʻtarilishi kerak.
$500 mlrddan $1 trlngacha
Mask 2025 yil 1 oktabrda boyligi $500 mlrdga yetgan tarixdagi birinchi insonga aylandi. Oʻsha kun yakuniga kelib uning boyligi biroz kamayib, $499,1 mlrdni tashkil etgan.
Oradan ikki yarim oy oʻtib, 15 dekabr kuni uning boyligi $600 mlrdlik chegaradan oshdi. Bunga SpaceX’ning ehtimoliy IPOsi oldidan kompaniya qiymatining keskin yuqori baholanishi asosiy omil boʻldi.
Atigi toʻrt kun oʻtib — 19 dekabrda Maskning boyligi $700 mlrddan oshdi. Bunga Delaver Oliy sudi Tesla’dagi avval bekor qilingan aksiyalar opsionlarini qayta tiklagani sabab boʻldi.
2026 yil 3 fevralda SpaceX va xAI birlashtirilgach, Maskning boyligi $800 mlrdlik marradan ham oʻtdi. Forbes oʻsha paytda uning aktivlarini rekord darajadagi $852 mlrdga baholagan.
SpaceX IPOsi arafasida Forbes Maskning boyligini qariyb $780 mlrd deb hisoblagan edi. Kompaniya aksiyalarining IPO narxi $135 etib belgilangach, Maskning SpaceX’dagi ulushi qariyb $866 mlrdga baholandi. Natijada uning jami boyligi Forbes va Reuters hisobida $1,1 trlndan oshib, u tarixdagi ilk trillionerga aylandi.
