Nizomiddin Abbosov “Biznesni rivojlantirish banki” raisi oʻrinbosari lavozimidan ozod etildi
“Biznesni rivojlantirish banki” boshqaruvi raisi oʻrinbosari vazifasini bajaruvchi Nizomiddin Abbosov lavozimidan ozod etildi va uning Boshqaruv aʼzosi sifatidagi vakolatlari muddatidan oldin tugatildi. U rais oʻrinbosari lavozimida qariyb 9,5 oy ishlagan. Bu soʻnggi bir oy ichida davlat banklarida kuzatilgan beshinchi shunday kadr oʻzgarishi boʻldi.
Nizomiddin Abbosov “Biznesni rivojlantirish banki” boshqaruvi raisi oʻrinbosari vazifasini bajaruvchi lavozimidan ozod qilindi. Bu haqda Kuzatuv kengashining 12 oktabrdagi qarorida maʼlum qilindi.
Hujjatda Abbosovning nima sababdan lavozimidan ozod etilgani va qaror uning arizasiga asosan qabul qilingan-qilinmagani koʻrsatilmagan. Majlis bayoni 21 oktabr kuni imzolangan.
Abbosov 2025 yil 30 dekabrda bank Boshqaruvi raisi oʻrinbosari etib tayinlangan edi. Unga qadar bankning Davlat dasturlari bosh direktori lavozimida ishlagan.
Abbosov ketganidan keyin uning oʻrniga yangi nomzod kiritilmagan. Natijada bank Boshqaruvi aʼzolari soni 9 nafardan 8 nafarga, raisning birinchi oʻrinbosari bilan birga oʻrinbosarlar soni esa 5 nafardan 4 nafarga kamaygan.
Davlat banklarida ketma-ket oʻzgarishlar
Bu davlat banklarida soʻnggi bir oy ichida kuzatilgan beshinchi shunday holat boʻldi.
17 sentabrda Mikrokreditbank boshqaruvi raisi oʻrinbosari Sodir Melibayev lavozimidan ketgan edi. Uning oʻrni yangi Boshqaruv tarkibida vakant qolgan.
24 sentabrda Xalq banki boshqaruvi raisi oʻrinbosari Xasanjon Ahmedov lavozimidan ozod etildi. Oradan bir kun oʻtib, Turonbank raisi oʻrinbosari vazifasini bajaruvchi Zohidjon Obidovning vakolatlari muddatidan oldin tugatildi.
30 sentabrda esa Aloqabank boshqaruvi raisi oʻrinbosari Akmal Xolmurodov lavozimidan ozod qilindi. Mazkur holatlarning barchasida bank Boshqaruvi tarkibidan bittadan rais oʻrinbosari chiqarilgan.
Shu tariqa, 17 sentabrdan 12 oktabrgacha boʻlgan davrda kamida beshta davlat bankida bittadan boshqaruv raisi oʻrinbosari lavozimini tark etdi.
Pinkod avvalroq bir-biridan mustaqil manbalarga tayanib, boshqa davlat banklarida ham shunga oʻxshash kadr oʻzgarishlari kutilayotgani haqida xabar bergan edi. Biroq Markaziy bank yoki hukumat davlat banklarida rais oʻrinbosarlari sonini umumiy tartibda qisqartirish boʻyicha hozircha ochiq rasmiy bayonot bermagan.
