AQShda davlat kriptovalyuta zaxirasi yaratiladi — Donald Tramp

Yakshanba kuni AQSh prezidenti Donald Tramp AQSh kripto strategik zaxirasini yaratish rejasini eʼlon qilganidan soʻng kriptovalyuta narxlari keskin oshdi. Unga koʻra, ushbu zaxira tarkibiga Bitcoin va Ethereum, shuningdek, uchta kichikroq va xavfliroq token ham kiritiladi.

Tramp oʻzining Truth Social platformasida: 

"AQSh dunyoning kripto poytaxtiga aylanadi. Kripto Strategik Zaxirasi bizning raqamli moliya sohasidagi yetakchiligimizni taʼminlaydi", – deb yozdi.

Hukumatning raqamli aktivlarni qoʻllab-quvvatlashi ehtimoli investorlarning ijobiy munosabatiga sabab boʻldi. Asosiy kripto valyutalar sezilarli darajada qimmatlashdi:

• Bitcoin (BTC): $92,937 (+8.1%) 
  Maksimal narx: $94,994 | Eʼlondan oldingi narx: $84,996
• Ethereum (ETH): $2,434.53 (+9.4%) 
  Maksimal narx: $2,545.51 | Eʼlondan oldingi narx: $2,181.74
• XRP (XRP): $2.79 (+23.4%) 
  Maksimal narx: $2.96 | Eʼlondan oldingi narx: $2.22
• Cardano (ADA): $1.047 (+58.2%) 
  Maksimal narx: $1.14 | Eʼlondan oldingi narx: $0.6459
• Solana (SOL): $168.66 (+17.7%) 
  Maksimal narx: $178.83 | Eʼlondan oldingi narx: $140.1

Trampning soʻzlariga koʻra, Kripto strategik zaxirasida Bitcoin va Ethereum asosiy valyutalar boʻlib xizmat qiladi, XRP, Cardano va Solana esa muhim tarkibiy qismlar sifatida kiritiladi. Shuningdek, uning rasmiy $TRUMP tokeni eʼlon ortidan 34 foizga oshdi.

Avvalroq, $TRUMP memkoini bilan bogʻliq janjallar yuzaga kelgan edi. 800 000 dan ortiq foydalanuvchi ushbu token ortidan $2 mlrd zarar koʻrgani, Trampga tegishli kompaniyalar esa tranzaksiya toʻlovlari orqali $100 mln foyda olgani haqida xabarlar tarqalgan edi.

25 fevral kuni kripto bozori pasayish qayd etilib, Bitcoin narxi noyabr oyidan beri ilk marta 90 ming dollardan pastga tushib ketdi, Ethereum va Solana ham keskin qulashga uchradi. Bunga texnologik aksiyalar va kriptovalyutalar kabi tavakkalli aktivlardan voz kechish tendensiyasi, shuningdek, ikki hafta oldin Bybit kripto birjasida sodir boʻlgan ulkan xakerlik hujumi sabab boʻldi. Biroq, Trampning yangi eʼloni ortidan kriptovalyutalar yana oʻsishni boshladi va hozir ham oʻsish davom etmoqda.

Hozircha bunday zaxira qanday yaratilishi va uning mamlakatga qanday foyda keltirishi mumkinligi noaniq.