Bitcoin narxi 2022 yil iyunidan beri eng past darajaga tushdi

24 fevral kuni Bitcoin (BTC) narxi 63 ming dollardan pastga tushib ketdi. Bu 2022 yil iyun oyidan beri kuzatilgan eng past narxdir. Soʻnggi 24 soat ichida kriptovalyuta narxi 4,11 foizga pasaydi. 

Hozirgi pasayish makroiqtisodiy omillar va bozor kayfiyatidagi oʻzgarishlar bilan izohlanmoqda.

Avvalo, global iqtisodiy fon noaniqligicha qolmoqda. AQShda import bojlarini, jumladan ayrim tovarlar uchun 15 foizgacha oshirish takliflari paydo boʻlgani moliya bozorlarida xavotirni kuchaytirdi. Natijada investorlar xavfli aktivlardan chiqib, xavfsizroq yoʻnalishlarga oʻtishni boshladi.

Jonli Bitcoin narxi bilan quyida tanishish mumkin:

Bundan tashqari, sunʼiy intellekt sababli mehnat bozorida ishsizlik oshishi mumkinligi haqidagi salbiy tadqiqot hisobotining tarqalishi ham investorlar kayfiyatiga taʼsir koʻrsatdi. Ushbu hisobot ijtimoiy tarmoqlarda keng muhokama qilinib, iqtisodiy kelajak borasida qoʻshimcha xavotirlarni yuzaga keltirdi. Natijada investorlar riskli aktivlarni portfelidan chiqarishga majbur boʻldi.

Yana bir muhim omil — AQShdagi spot Bitcoin ETFʼlari ketma-ket besh hafta davomida sof mablagʻ chiqimini qayd etdi. Yil boshidan buyon umumiy chiqimlar qariyb 4,5 milliard dollarni tashkil etgan. Bu esa institutsional investorlar orasida ham ehtiyotkorlik kuchayganini koʻrsatadi.

Tahlilchilarning aytishicha, soʻnggi uch hafta ichida yirik korporativ investorlar oldingi kabi Bitcoin toʻplash oʻrniga, aksincha, uni sotishga oʻtgan.