Тарихдаги энг катта ўғирлик: хакерлар Bybit биржасидан $1,5 млрдлик крипто-активларни ўғирлашди
Киберҳужум натижасида 400 000 та Ethereum токенлари ўғирланган бўлиб, унда Шимолий Корея хакерларининг эҳтимолий иштироки мавжудлиги тахмин қилинмоқда.
Криптовалюта биржаси Bybit хакерлар ҳужумига учраганлигини маълум қилди. Бу ҳақида Bloomberg хабар берди.
Таҳлилчиларнинг ҳисоб-китобига кўра, бу ҳодиса соҳа тарихидаги энг катта ўғирлик бўлиб, деярли 1,5 миллиард долларга тенг токенлар йўқолган. Тадқиқотчилар бу ҳужумда Шимолий Корея хакерларининг эҳтимолий иштирок этганлигини тахмин қилишмоқда.
Бош директор X ижтимоий тармоғида эълон қилган постида хакерлар биржанинг офлайн Ethereum ҳамёнларидан бирини назоратга олгани айтилади.
On-chain таҳлилчи ZachXBT Telegram каналида берган маълумотларга кўра, ҳамёндан тахминан 1,46 миллиард долларлик активлар шубҳали транзаксиялар орқали оқиб чиққан.
Шунингдек, тадқиқот фирмаси Arkham Intelligence маълумотига кўра, ушбу хакерлик ҳужуми Шимолий Кореянинг Lazarus гуруҳи томонидан амалга оширилгани аниқланган. Компания вакиллари ZachXBT гуруҳнинг айбдорлигини тасдиқловчи ишончли далилларни тақдим этганини билдирган.
X тармоғидаги постида Arkham Intelligence биржадан тахминан 1,4 миллиард доллар маблағ чиқиб кетгани ва уларнинг янги манзилларга кўчирилиб, сотувга чиқарилаётганини маълум қилган.
Elliptic блокчейн таҳлил фирмасининг маълумотларига кўра, бу хакерлик ҳодисаси 2021 йилда Poly Network’дан ўғирланган 611 миллион доллардан ҳам кўпроқ бўлиб, крипто соҳасидаги энг катта ўғирликка айланди. Halborn блокчейн хавфсизлик фирмаси эса бу ҳодисани нафақат крипто, балки барча соҳалардаги энг катта жиноят эканлигини таъкидлади.
Bybit раҳбари кейинчалик ижтимоий тармоқда чиқиш қилиб, компания маблағларни қайтариш бўйича барча ишларни қилаётгани ва агар хакерлар топилмаса, пуллар эгаларига тўлиқ қайтарилишини айтиб ўтди.
2018 йилда асос солинган Bybit дунёдаги энг йирик крипто-биржаларидан бири ҳисобланади ва кунлик ўртача савдо ҳажми 36 миллиард доллардан ошади. CoinMarketCap захира маълумотларига кўра, хакерлик ҳужумига учрашдан олдин биржадаги активлари тахминан 16,2 миллиард долларни ташкил этган. Ўғирланган Ethereum миқдори эса платформа жами активларининг тахминан 9 фоизига тенг бўлган.
Маълумотларга кўра, ҳужумдан сўнг фойдаланувчилар $2 млрдлик активларини биржадан чиқариб олган. Шунингдек, ўғирланган Ethereum’нинг жами миқдори тахминан 400 000 тани ташкил қилади.
Аввалроқ, Шимолий Корея хакерлари 2024 йилда жами $1,3 млрдлик крипто-активларни ўғирлагани ҳақида хабар берилган эди.
