Bitcoin narxi soʻnggi 10 oydagi eng past darajaga tushdi

Bitcoin (BTC) 2026 yil 2 fevral kuni soʻnggi 10 oy ichidagi eng past koʻrsatkichga tushib, 74 541 dollargacha pasaydi. Bu ketma-ket toʻrtinchi oy Bitcoin narxining pasayishi boʻlib, 2018 yildan buyon kuzatilgan eng uzoq yoʻqotishlar seriyasiga aylandi. Kriptovalyuta 2025 yilda qayd etilgan 126 ming dollardan yuqori rekord darajadan qariyb 40 foizga arzonlashgan.

Bitcoin’ning jonli narxi bilan quyida tanishish mumkin:

Soʻnggi keskin sotuvlar bir nechta omillarning uygʻunlashuvi natijasida yuz bermoqda:

Qimmatbaho metallar bozoridagi qulash. 
30 yanvar, juma kuni oltin va kumush narxlarining keskin pasayishi metallar qulashini keltirib chiqardi. Ushbu bozorlarda katta yoʻqotishlarga uchragan treyderlar marja chaqiruvlarini qoplash uchun boshqa aktivlarni, jumladan Bitcoinni sotishga majbur boʻldi.

Federal rezerv rahbarligiga nomzod omili. 
AQSh prezidenti Donald Tramp tomonidan Kevin Uorshning Federal rezerv tizimi rahbarligiga nomzod sifatida ilgari surilishi riskli aktivlarga bosim oʻtkazdi. Bozorlar Uorshni inflyatsiyaga nisbatan qatʼiy pozitsiyaga ega shaxs sifatida baholamoqda, bu esa foiz stavkalarining pasayishi boʻyicha kutishlarni susaytirib, dollar pozitsiyalarini mustahkamladi.

Yirik likvidatsiyalar. 
Soʻnggi 24 soat ichida qariyb 590 million dollarlik long (uzoq muddatli) pozitsiyalar majburiy yopildi. Dam olish kunlari davomida kripto bozoridagi umumiy likvidatsiyalar hajmi 1,6 milliard dollarga yaqinlashdi, chunki narxlar muhim qoʻllab-quvvatlash darajalaridan pastga tushib ketdi.

Likvidlikning keskin kamayishi. 
Savdo likvidligi, ayniqsa hafta oxiri va Osiyo sessiyalarida sezilarli darajada pasaydi. Natijada nisbatan kichik sotuv buyurtmalari ham bozor narxiga katta taʼsir koʻrsatmoqda.

Institutsional investorlar chiqib ketishi. 
Spot Bitcoin ETF’lariga boʻlgan qiziqish ham pasaymoqda. 2026 yil boshidan buyon ushbu fondlardan sof chiqimlar hajmi qariyb 6 milliard dollarni tashkil etdi.