Прогноз: 2025 йилда олтин нархи қанчагача кўтарилиши мумкин?
Жаҳоннинг йирик молиявий институтлари олтин нархи 2025 йилнинг биринчи чорагидаёқ $3,000 лик рекорд даражага етганидан сўнг, оптимистик прогнозлар бермоқда.
Pinkod эса ушбу таҳминларни таҳлил қилиб, уларни бир жойга жамлади.
Олтин ҳар доим иқтисодий ноаниқлик шароитида энг ишончли инвестиция воситаларидан бири бўлиб келган. Бугунги дунёда ҳам худди шундай ҳолат кузатилмоқда.
Бир томонда мамлакатлар ўртасида савдо урушлари давом этаётган бўлса, яна бир томонда геосиёсий кескинлик ва қуролли можаролар кучайиб бормоқда. Бунинг натижасида олтин нархи 14 март куни илк маротаба $3 000 дан юқорига кўтарилди.
Мазкур ўзгаришлар фонида, кўпчиликда: "Олтин нархи бу йил яна қанчагача кўтарилади?" деган савол пайдо бўлиши табиий.
Гарчи олтин бозорини аниқ прогноз қилиш мураккаб бўлса-да, молиявий институтлар 2025 йилнинг қолган қисми учун тахминий прогнозларни тақдим этмоқда. Бугунги мақолада биз ушбу тахминлар ва уларнинг сабабларини батафсил ўрганамиз.
Энг юқори прогноз
Энг юқори прогнозни Macquarie Group тақдим этган бўлиб, унинг тахминига кўра, 2025 йилнинг учинчи чорагида олтин нархи $3,500 га етиши мумкин. Ушбу прогноз қуйидаги асосий омилларга таянади:
Марказий банкларнинг талаби – ривожланаётган давлатларнинг марказий банклари валюта хавфларидан ҳимояланиш мақсадида олтин захираларини кўпайтирмоқда. Жумладан, Ўзбекистон Марказий банки ҳам январь ойида 8 тонна соф олтин харид қилган.
Иқтисодий ноаниқлик – савдо можаролари ва йирик иқтисодиётларнинг секинлашиш эҳтимоли инвесторларни хавфсиз активларга йўналтирмоқда.
АҚШ Федерал Резерв тизими(ФЕД) сиёсати – йил охирига бориб фоиз ставкалари пасайиши кутилмоқда, бу эса АҚШ долларини заифлаштириб, олтинни жозибадорроқ қилади.
Бошқа йирик тахминлар
Macquarie энг юқори прогнозни берган бўлса, бошқа йирик банклар ҳам оптимистик башоратларни эълон қилган:
UBS (Швейсария) – $3,200+
Швейсариянинг етакчи инвестицион банкларидан бири бўлган UBS 2025 йилда олтин $3,200 дан юқорига кўтарилиши мумкинлигини таъкидламоқда. Банкнинг 2025 йил 17 февралда эълон қилинган таҳлилига кўра, марказий банклар томонидан кучли талаб ва бозорнинг умумий оптимизми асосий омиллар сифатида кўрсатилган.
Goldman Sachs (АҚШ) – $3,100 – $3,300
Американинг трансмиллий инвестиция банки Goldman Sachs 2025 йил охири учун $3,100 лик нархни тахмин қилмоқда, аммо янада оптимистик сценарийда $3,300 гача етиши мумкинлигини билдирган. Банк буни марказий банкларнинг кўпроқ олтин сотиб олиши ва сиёсий ноаниқликлар билан боғламоқда.
Баъзи манбалар бундан-да юқорироқ прогнозларни беришган, бироқ уларнинг ишончлилик даражаси анча паст эканлиги туфайли, таҳлилни тайёрлаш жараёнида инобатга олинмади.
Айни пайтдаги олтин нархи
Ҳозирда (2025 йил 26 март ҳолатига кўра), жаҳон бозорида олтин $3 025 атрофида савдо қилинмоқда, бу эса юқоридаги прогнозларга жуда яқиндир.
Олтин нархининг 2025 йилда қанчага кўтарилиши аниқ бўлмаса-да, мавжуд омиллар унинг барқарор ўсишини қўллаб-қувватлаётгани кўрсатиб турибди. Бироқ, глобал иқтисодий вазият барқарорлашса ёки FED фоиз ставкаларини туширмаса, олтин нархи ошиш ўрнига пасайиши ҳам мумкин.
Ўзбекистонда олтинни қандай сотиб олиш мумкин?
Ўзбекистонда Марказий банк томонидан 999,9 софликдаги олтиндан 5, 10, 20, 50 ва 100 граммли қуймалар сотувга чиқарилган ва қуймалар нархини регулятор ҳар куни янгилаб боради. Мисол учун, 26 март куни амал қуймалар учун амал қиладиган нарх қуйидагича:
- 5 гр — 6 477 000 сўм
- 10 гр — 12 954 000 сўм
- 20 гр — 25 908 000 сўм
- 50 гр — 64 769 000 сўм
- 100 гр — 129 539 000 сўм
Олтин қуймаларини банклардан сотиб олиш имконияти мавжуд. Банкларнинг манзиллари ва батафсил маълумотларни Марказий банк расмий сайтидан топиш мумкин.
