Олтин нархи илк бор $3 000 га етди
Ўзбекистонда сотилаётган олтин қуймалари нархи ҳам рекорд даражага етди.
Жаҳон бозорида олтин нархи тарихда илк бор унция учун $3 000 дан юқорига кўтарилди.
Ушбу ўсишнинг асосий сабаби глобал миқёсда давом этаётган савдо урушлари ва геосиёсий ноаниқликлар билан боғлиқ. Бундай ноаниқлик шароитида олтин энг хавфсиз инвестиция воситаларидан бири сифатида қаралади, бу эса унинг нархининг ошишига сабаб бўлмоқда.
Олтин нархининг $3 000 даражасига етиши 2025 йил учун илгари сурилган тахминлардан биридир. Жумладан, Bank of America ва Goldman Sachs экспертлари ушбу башоратларни эълон қилган эди.
Кейинчалик Goldman Sachs бир неча бор ўз тахминларини янгилаб, февраль ойидаги прогнозида олтин нархининг $3 100 га етишини тахмин қилган. Citi Bank эса февраль бошида олтин нархи келаётган уч ой ичида $3 000 га чиқишини башорат қилган эди. Ушбу прогноз ўз тасдиғини топди.
Дунё молиявий институтлари эса олтин нархининг бундан ҳам юқорига кўтарилишини кутмоқда. Хусусан, Macquarie Group таҳлилчиларининг фикрига кўра, 2025 йилнинг учинчи чорагида олтин нархи $3 500 га етиши мумкин.
Ўзбекистонда олтин нархлари
Жаҳон бозоридаги ўсиш фонида Ўзбекистонда ҳам олтин нархлари рекорд даражага етди. Марказий банк томонидан эълон қилинган маълумотларга кўра, 14 март ҳолатига кўра тижорат банкларида сотилаётган олтин қуймаларининг нархлари қуйидагича белгиланган:
- 1 грамм – 1 272 440 сўм
- 5 грамм – 6 362 000 сўм
- 10 грамм – 12 724 000 сўм
- 20 грамм – 25 449 000 сўм
- 50 грамм – 63 622 000 сўм
- 100 грамм – 127 022 000 сўм
Банкларнинг манзиллари ва батафсил маълумотларни Марказий банк расмий сайтидан топиш мумкин.
