2025 йилда Ўзбекистон уй-жой бозори қандай ўзгарди?

2025 йилда Ўзбекистонда 319,5 мингта уй-жой олди-сотди шартномаси расмийлаштирилган. Бу ҳақда Марказий банк ҳисоботида маълум қилинди.

2024 йилга нисбатан кўчмас мулк бозоридаги фаоллик 15,8% га ошган. Йилнинг сўнгги чорагида (октябрь–декабрь) фуқаролар 89,7 мингта битим тузган бўлиб, бу ўтган йилнинг шу даврига нисбатан қарийб 25% кўп.

Энг катта ўсиш Бухоро вилоятида кузатилган — 25,6%. Ундан кейин Сирдарё вилояти (23,1%) ва Самарқанд вилояти (19,2%) туради. Тошкент шаҳри, Тошкент вилояти ва Фарғона вилоятида эса квартира савдоси ўртача 15,5% га ошган.

Марказий банк таҳлилчиларига кўра, ҳудудларда уй-жойга талабнинг ошиши пойтахтдан ташқарида инфратузилма яхшиланаётганини кўрсатади. Шунингдек, аҳолининг даромадлари ортиб бораётгани ҳам савдолар кўпайишига таъсир қилмоқда.

Йил давомида ажратилган ипотека кредитлари ҳажми 21,2 триллион сўмни ташкил этиб, бу ўтган йилга нисбатан 29% кўп. Кўрсаткич йил давомида барқарор ўсиб борган ва тўртинчи чоракда 6 триллион сўмга яқинлашган.

Шу билан бирга, ипотека ҳисобига сотиб олинган уй-жойлар улуши деярли ўзгармаган — 2024 йилдаги 21,3% га нисбатан 22%.

Марказий банк, шунингдек, фойдаланишга топширилган уй-жой майдони 7,2% га ошиб, 15,9 млн квадрат метрга етганини қайд этди. Хоразм вилоятида қурилиш ҳажми 36% га ошган — солиштириш учун, ўсиш бўйича иккинчи ўриндаги Сурхондарё вилоятида бу кўрсаткич 6,7%ни ташкил этган.

Бирламчи бозорда уй-жой нархлари охирги чоракда сўмда 1,3% га пасайган, аммо долларда 5,7% га ошган. Иккиламчи бозорда эса нархлар миллий валютада 0,7%, долларда 7,9% га кўтарилган.

Марказий банк бу фарқни валюта курсининг мустаҳкамланиши, шунингдек, сотувчиларнинг уй-жой қийматини сақлаб қолиш мақсадида нархларни долларда белгилаши ҳамда аста-секин ҳисоб-китобларни миллий валютада ифодалашга ўтилаётгани билан изоҳлайди.

Уй-жой ижараси нархларининг доллардаги ўсиш суръати йил охирига келиб 8,3% га етган, бироқ Тошкент шаҳрида бу кўрсаткич мамлакат ўртача даражасидан бироз паст. Шу билан бирга, сўмда ижара нархлари деярли ўзгармаган, бу эса бозорда таклиф талабни етарли даражада қоплаётганини кўрсатади.