Ilon Maskning sunʼiy intellekt kompaniyasi xAI oʻz chatboti Grok bilan foydalanuvchilar oʻrtasida boʻlgan yuz minglab suhbatlarni internetga chiqargani aniqlandi. Bu haqda Forbes xabar bermoqda.

Eng xavotirlisi, bu suhbatlar koʻpincha foydalanuvchilarning xabarisiz va ruxsatisiz eʼlon qilingan.

Suhbatlar qanday qilib internetga chiqib ketdi?

Grok’da foydalanuvchilar suhbatni doʻstlari bilan ulashishi uchun “share” tugmasi mavjud. Tugma bosilganda maxsus havola yaratiladi va uni elektron pochta, ijtimoiy tarmoq yoki SMS orqali yuborish mumkin. Ammo muammo shundaki, bu havolalar nafaqat ulashilgan odamga, balki Google, Bing va DuckDuckGo kabi qidiruv tizimlariga ham ochiq boʻladi. Natijada, suhbatlar butun internet uchun izlanadigan va oʻqiladigan holga kelib qolgan.

Google qidiruv tizimi bugungi kunda 370 mingdan ortiq Grok suhbatlarini indekslab boʻlgan.

Nimalar oshkor boʻldi?

Forbes jurnalistlari oʻrganishlari davomida turli mazmundagi suhbatlarga duch kelgan:

Oddiy topshiriqlar – tvit yozish, matn qisqartirish, biznes maslahati olish.
Shaxsiy suhbatlar – tibbiyot, psixologiya haqidagi savollar, foydalanuvchilarning ism-shariflari, shaxsiy maʼlumotlari va hatto parollari.
Yuklangan hujjatlar – suratlar, Excel jadvallari, matnli fayllar.
Qoidabuzar soʻrovlar – narkotik moddalar tayyorlash, zararli dastur yozish, bomba yasash boʻyicha koʻrsatmalar. Hatto Grok’dan Ilon Maskni oʻldirish rejasi haqida yoʻriqnoma olgan foydalanuvchilar ham boʻlgan.

Bu suhbatlarning barchasi, “ulashish” tugmasi tufayli, ochiq veb-sahifa sifatida Grok saytidan chiqib, qidiruv tizimlariga tushib qolgan.

Mashhur foydalanuvchilar ham aldanib qolgan

Britaniyalik jurnalist Endryu Klifford Grok’dan gazeta sarlavhalarini qisqartirish va tvit yozishda foydalanib kelgan. U suhbatlarining Google’da koʻrinayotganini bilmagandi. Forbes’ga bergan izohida u “Biroz noqulay boʻldi, lekin maxfiy narsalar yoʻq edi” deb aytgan va endilikda Google Gemini AI’ga oʻtganini bildirgan.

Xuddi shunday, Allen Institute for AI olimi Neytan Lamber ham Grok’dan blog postlarini qisqartirib jamoasi bilan boʻlishgan. Lekin suhbatlarining Google’da chiqib qolgani haqida Forbes’dan eshitib, juda hayratda qolganini aytgan.

Bu kabi vaziyat biroz oldin OpenAI bilan ham kuzatilgan. ChatGPT foydalanuvchilari ham suhbatlarining Google’da chiqib qolganini payqashgan. Ammo OpenAI tezda siyosatini oʻzgartirdi va indekslashni toʻxtatdi. Kompaniya bu holatni “tajribaviy xato” deb tan oldi.

Shu paytda Ilon Mask Grok’ning afzalligini maqtanib “bizda bunday funksiya yoʻq” degan edi. Endi esa Grok’da ham “ulashish” funksiyasi borligi va suhbatlar ommaga chiqib ketayotgani tasdiqlandi.

Ilon Maskning xAI kompaniyasi yuz minglab Grok chatbot suhbatlarini oshkor qilgan — Forbes

Apple va Google kabi kompaniyalarning 16 milliard login va parollari internetga tarqalib ketgan — Forbes