Oʻzbekiston tashqi iqtisodiy faoliyat milliy banki (NBU) 2025 yil birinchi choragi uchun moliyaviy hisobotni eʼlon qildi. Hisobotda koʻrsatilishicha, bank chorak yakunida 467,9 milliard soʻm sof foyda qayd etgan.

Bu koʻrsatkich oʻtgan yilning shu davriga nisbatan biroz (0,5 foiz) yuqoridir. Hozirda bankning umumiy aktivlari 136,9 trln soʻmga ($10,54 mlrd) yetgan boʻlib, yil boshidan beri 1,9 trln soʻmga oshgan. Ustav kapitali esa 16,2 trln soʻmni tashkil qilmoqda.

Yanvar-mart oylarida Milliy bank 4,1 trln soʻm foizli daromad olgan. Biroq, kredit va lizing faoliyatidan kelib chiqishi mumkin boʻlgan zararlar inobatga olinganda, foizli daromad boʻyicha 1,2 trln soʻm zarar qayd etilgan. Shu bilan birga, foizsiz daromadlar 2,4 trln soʻmni tashkil etdi.

Bank ushbu chorakda 17 mlrd soʻmlik soliq toʻlagan. Barcha xarajatlar chegirilgandan soʻng, sof foyda 467,9 mlrd soʻmni tashkil qildi.

Kredit portfeli holati

1 mart holatiga koʻra, NBU’ning kredit portfeli 108,1 trillion soʻmni tashkil etgan. Shuningdek, muammoli kreditlar miqdori 4 trillion soʻmga teng. Bank mazkur ikki koʻrsatkich boʻyicha mamlakatda yetakchi hisoblanadi.

Oʻzmilliybank birinchi chorakda deyarli yarim trillion soʻm sof foyda oldi