Donald Tramp ikkinchi muddatga saylanganidan beri dunyoning eng boy odamlari sezilarli moliyaviy yoʻqotishlarga uchramoqda. Bloomberg tomonidan eʼlon qilingan maʼlumotga koʻra, eng boy besh milliarder Trampning prezidentlikka qaytishidan beri jami 209 milliard boylik yoʻqotgan.

Donald Tramp 20 yanvar kuni ikkinchi muddatga qasamyod qabul qilganida, u dunyoning eng boy kishilari orasida turardi. Ilon Mask, Jeff Bezos va Mark Sukerberg kabi milliarderlar fond bozorlari yuksalishi tufayli misli koʻrilmagan boylikka ega boʻlishdi. Biroq, atigi yetti hafta ichida moliyaviy manzara keskin oʻzgardi.

Dastlab, Trampning biznesga qulay siyosati aksiyalar bozorining oʻsishiga turtki bergandek koʻrindi. Tesla 98 foizga, Bernar Arnoning LVMH kompaniyasi esa 7 foizga oʻsdi. Meta aksiyalari ham inauguratsiya oldidan 9 foiz, soʻngra dastlabki toʻrt haftada yana 20 foizga oshdi. Biroq, iqtisodiy beqarorlik, davlat xizmatchilarining ishdan boʻshatilishi va savdo siyosatining oʻzgarishi tufayli bozor kutilgan natijalarga erisha olmadi. Tramp inauguratsiyasidan beri ushbu milliarderlarning kompaniyalari jami 1,39 trillion bozor qiymatini yoʻqotdi. Ularning shaxsiy boyligidagi kamayishlar esa quyidagicha:

Ilon Mask — $148 milliard

Tesla bosh direktori Ilon Maskning boyligi dekabr oyi oʻrtalarida 486 milliardga chiqib, Bloomberg boylik indeksida qayd etilgan eng yuqori koʻrsatkichga yetdi. Biroq, Tesla aksiyalari asosiy bozorlarda sotuvlarning pasayishi tufayli keskin tushib ketdi. Yevropalik isteʼmolchilar Maskning siyosiy aloqalari tufayli Tesla’dan uzoqlashdi, Xitoy joʻnatmalari esa oʻtgan oyda 49 foizga kamaydi. Natijada Mask $148 milliard miqdorida boylik yoʻqotdi.

Jeff Bezos — $29 milliard

Ilgari Tramp bilan kelishmovchiliklarga uchragan Amazon asoschisi Jeff Bezos saylovdan soʻng munosabatlarni yumshatishga harakat qilgandek koʻrindi, hatto prezident bilan kechki ovqatda ham qatnashdi. Amazon Trampning inauguratsiya fondiga 1 million xayriya qilganiga qaramay, kompaniya aksiyalari 17 yanvardan beri 14 foizga tushib ketdi va Bezosning boyligi $29 milliardga kamayishiga hissa qoʻshdi.

Sergey Brin — $22 milliard

Google hammuassisi Sergey Brin, bir paytlar Tramp siyosatining qatʼiy tanqidchisi boʻlsa-da, saylovdan keyin u bilan uchrashdi. Alphabet Inc. aksiyalari fevral oyida kutilganidan past daromad koʻrsatkichlari tufayli 7 foizdan koʻproqqa tushib ketdi. Shuningdek, kompaniya Adliya vazirligi tomonidan kuchaytirilgan tekshiruvga duch kelmoqda. Bu holat uning bozor qiymatiga yanada salbiy taʼsir koʻrsatib, Brinning $22 milliard yoʻqotishiga sabab boʻldi.

Mark Sukerberg — $5 milliard

Meta dastlab umumiy bozor tendensiyalariga qarshi oʻlaroq, yil boshida uning aksiyalari yirik texnologiya kompaniyalarinikidan yuqori koʻrsatkichga erishdi. Biroq bu oʻsish uzoqqa choʻzilmadi. Magnificent Seven texnologiya aksiyalari indeksi dekabr oyidagi eng yuqori koʻrsatkichdan 20 foizga tushib ketgach, Sukerbergning boyligi $5 milliardga kamaydi.

Bernar Arno — $5 milliard

LVMH kompaniyasining egasi, hashamatli tovarlar magnati Bernar Arno uzoq vaqtdan beri Tramp bilan aloqalarini saqlab kelmoqda. LVMH aksiyalarining saylovdan keyingi dastlabki oʻsishiga qaramay, kompaniya aksiyalari tushib ketdi. Yevropaning hashamatli tovarlariga qoʻyilishi kutilayotgan bojlar esa bu pasayishni yanada kuchaytirdi. Natijada Arnoning boyligi $5 milliardga kamaydi.

Tramp inauguratsiyasidan beri eng boy milliarderlar jami $209 mlrd yoʻqotdi