2025 yilning eng boy odamlari — Forbes
Ilon Mask $342 milliardlik boyligi bilan dunyoning eng boy odami sifatida qayt etildi.
Meta asoschisi Mark Sukerberg ilk bor ikkinchi oʻringa koʻtarilib, Amazon rahbari Jeff Bezos va Oracle asoschisi Larri Ellisonni ortda qoldirdi.
Dunyodagi 3028 milliarderning 406 nafari ayollar boʻlib, ular jami milliarderlarning 13,4 foizini tashkil etadi.
Amerikaning Forbes jurnali dunyoning eng boy odamlari reytingini eʼlon qildi. Bu yil Forbesʼning yillik Jahon milliarderlari roʻyxatiga dunyo boʻylab 3028 kishi kiritildi. Ularning umumiy boyligi 2025 yil uchun rekord darajadagi 16,1 trillion dollarni tashkil etmoqda.
Ilon Mask $342 milliardlik boyligi bilan dunyoning eng boy odami sifatida qayt etildi. U Bernar Arnoni ortda qoldirib, Forbesʼning 2025-yilgi reytingida birinchi oʻrinni egalladi.
Meta asoschisi Mark Sukerberg ilk bor ikkinchi oʻringa koʻtarilib, Amazon rahbari Jeff Bezos va Oracle asoschisi Larri Ellisonni ortda qoldirdi. 2024 yilda eng boy odam boʻlgan Bernar Arno esa bu yil beshinchi oʻringa tushdi.
Top 10 roʻyxat:
| # | Ism | Boylik | Daromad manbai | Davlat |
| 1 | Ilon Mask | $342 mlrd | Tesla, SpaceX, xAI | AQSh |
| 2 | Mark Sukerberg | $216 mlrd | Meta | AQSh |
| 3 | Jeff Bezos | $215 mlrd | Amazon | AQSh |
| 4 | Larri Ellison | $192 mlrd | Oracle | AQSh |
| 5 | Bernar Arno | $178 mlrd | LVMH | Fransiya |
| 6 | Uorren Baffet | $154 mlrd | Berkshire Hathaway | AQSh |
| 7 | Larri Peyj | $144 mlrd | AQSh | |
| 8 | Sergey Brin | $138 mlrd | AQSh | |
| 9 | Amanio Ortega | $124 mlrd | Zara | Ispaniya |
| 10 | Stiv Balmer | $118 mlrd | Microsoft | AQSh |
Dunyodagi 3028 milliarderning 406 nafari ayollar boʻlib, ular jami milliarderlarning 13,4 foizini tashkil etadi. Bu yil ularning soni 2024 yildagi 369 nafardan (13,3 foiz) koʻpaydi. Dunyoning eng boy ayoli maqomini Walmart merosxoʻri Elis Uolton egalladi, u fransuz L’Oréal merosxoʻri Fransuaza Bettenkur Meyersni ortda qoldirib, ayollar orasida birinchi oʻrinni qoʻlga kiritdi.
Diqqatga sazovor jihati shundaki, milliarder fuqarolar roʻyxatida Amerika Qoʻshma Shtatlari 902 nafar bilan yetakchilik qilmoqda. Undan keyin Xitoy (Gonkong bilan birga) 516 nafar bilan ikkinchi oʻrinda turadi. Hindiston esa 205 nafar milliarder bilan uchinchi oʻrinni egallab turibdi.
Oʻzbekistonlik milliarder
Alisher Usmonov ilk bor ushbu roʻyxatda Oʻzbekiston vakili sifatida qayd etildi.
USM Holdings asoschisi boʻlgan Alisher Usmonov avvalgi yillarda Rossiya vakili sifatida koʻrsatilgan edi. Biroq, endilikda Forbes uni rasmiy ravishda Oʻzbekiston tadbirkori sifatida eʼtirof etdi. Uning boyligi oʻtgan yilga nisbatan $3,3 milliardga ortib, hozirda $16,7 milliardni tashkil etmoqda. Shuningdek, Usmonov jahon reytingida 144-oʻrindan 125-oʻringa koʻtarildi.
Mavzuga doir: Tramp inauguratsiyasidan beri eng boy milliarderlar jami $209 mlrd yoʻqotdi
