Трамп инаугурациясидан бери энг бой миллиардерлар жами $209 млрд йўқотди
Мазкур миллиардерлар мулкига боғлиқ компаниялар бозор қиймати эса жами $1,39 трлнга камайди.
Доналд Трамп иккинчи муддатга сайланганидан бери дунёнинг энг бой одамлари сезиларли молиявий йўқотишларга учрамоқда. Bloomberg томонидан эълон қилинган маълумотга кўра, энг бой беш миллиардер Трампнинг президентликка қайтишидан бери жами 209 миллиард бойлик йўқотган.
Доналд Трамп 20 январь куни иккинчи муддатга қасамёд қабул қилганида, у дунёнинг энг бой кишилари орасида турарди. Илон Маск, Жефф Безос ва Марк Сукерберг каби миллиардерлар фонд бозорлари юксалиши туфайли мисли кўрилмаган бойликка эга бўлишди. Бироқ, атиги етти ҳафта ичида молиявий манзара кескин ўзгарди.
Дастлаб, Трампнинг бизнесга қулай сиёсати акциялар бозорининг ўсишига туртки бергандек кўринди. Tesla 98 фоизга, Бернар Арнонинг LVMH компанияси эса 7 фоизга ўсди. Мета акциялари ҳам инаугурация олдидан 9 фоиз, сўнгра дастлабки тўрт ҳафтада яна 20 фоизга ошди. Бироқ, иқтисодий беқарорлик, давлат хизматчиларининг ишдан бўшатилиши ва савдо сиёсатининг ўзгариши туфайли бозор кутилган натижаларга эриша олмади. Трамп инаугурациясидан бери ушбу миллиардерларнинг компаниялари жами 1,39 триллион бозор қийматини йўқотди. Уларнинг шахсий бойлигидаги камайишлар эса қуйидагича:
Илон Маск — $148 миллиард
Tesla бош директори Илон Маскнинг бойлиги декабрь ойи ўрталарида 486 миллиардга чиқиб, Bloomberg бойлик индексида қайд этилган энг юқори кўрсаткичга етди. Бироқ, Tesla акциялари асосий бозорларда сотувларнинг пасайиши туфайли кескин тушиб кетди. Европалик истеъмолчилар Маскнинг сиёсий алоқалари туфайли Tesla’дан узоқлашди, Хитой жўнатмалари эса ўтган ойда 49 фоизга камайди. Натижада Маск $148 миллиард миқдорида бойлик йўқотди.
Жефф Безос — $29 миллиард
Илгари Трамп билан келишмовчиликларга учраган Amazon асосчиси Жефф Безос сайловдан сўнг муносабатларни юмшатишга ҳаракат қилгандек кўринди, ҳатто президент билан кечки овқатда ҳам қатнашди. Amazon Трампнинг инаугурация фондига 1 миллион хайрия қилганига қарамай, компания акциялари 17 январдан бери 14 фоизга тушиб кетди ва Безоснинг бойлиги $29 миллиардга камайишига ҳисса қўшди.
Сергей Брин — $22 миллиард
Google ҳаммуассиси Сергей Брин, бир пайтлар Трамп сиёсатининг қатъий танқидчиси бўлса-да, сайловдан кейин у билан учрашди. Alphabet Inc. акциялари февраль ойида кутилганидан паст даромад кўрсаткичлари туфайли 7 фоиздан кўпроққа тушиб кетди. Шунингдек, компания Адлия вазирлиги томонидан кучайтирилган текширувга дуч келмоқда. Бу ҳолат унинг бозор қийматига янада салбий таъсир кўрсатиб, Бриннинг $22 миллиард йўқотишига сабаб бўлди.
Марк Цукерберг — $5 миллиард
Meta дастлаб умумий бозор тенденцияларига қарши ўлароқ, йил бошида унинг акциялари йирик технология компаниялариникидан юқори кўрсаткичга эришди. Бироқ бу ўсиш узоққа чўзилмади. Magnificent Seven технология акциялари индекси декабрь ойидаги энг юқори кўрсаткичдан 20 фоизга тушиб кетгач, Цукербергнинг бойлиги $5 миллиардга камайди.
Бернар Арно — $5 миллиард
LVMH компаниясининг эгаси, ҳашаматли товарлар магнати Бернар Арно узоқ вақтдан бери Трамп билан алоқаларини сақлаб келмоқда. LVMH акцияларининг сайловдан кейинги дастлабки ўсишига қарамай, компания акциялари тушиб кетди. Европанинг ҳашаматли товарларига қўйилиши кутилаётган божлар эса бу пасайишни янада кучайтирди. Натижада Арнонинг бойлиги $5 миллиардга камайди.
