Tramp hokimiyatga kelganidan beri 1000 dan ortiq oʻzbekistonlik AQShdan deportatsiya qilindi
11 mart kuni AQSh yana 72 nafar Oʻzbekiston fuqarosini mamlakatdan deportatsiya qildi. AQSh elchixonasiga koʻra, Donald Tramp prezidentlikka kelganidan buyon noqonuniy immigratsiyaga qarshi siyosat doirasida 1000 dan ortiq oʻzbekistonlik deportatsiya qilingan.
11 mart kuni Amerika Qoʻshma Shtatlari 72 nafar Oʻzbekiston fuqarosini deportatsiya qildi. Bu haqda AQShning Oʻzbekistondagi elchixonasi maʼlum qildi.
Qayd etilishicha, ushbu shaxslar AQSh hududida qolish uchun qonuniy ruxsatga ega boʻlmagan. Elchixona bayonotiga koʻra, mazkur parvoz Qoʻshma Shtatlarning chegaralar xavfsizligini taʼminlash hamda noqonuniy immigratsiyaga qarshi kurash doirasida amalga oshirilgan navbatdagi choradir.
Maʼlum qilinishicha, Donald Tramp prezidentlik lavozimiga kirishganidan buyon AQSh hukumati noqonuniy immigratsiyaga qarshi siyosat doirasida 1000 dan ortiq Oʻzbekiston fuqarosini deportatsiya qilgan.
Shuningdek, rasmiy xabarda AQSh hududiga noqonuniy kirgan shaxslar hibsga olinishi va mamlakatdan chiqarib yuborilishi mumkinligi taʼkidlangan. AQSh tomoni deportatsiya jarayonlarini tashkil etishda hamkorlik qilayotgani uchun Oʻzbekiston hukumatiga ham minnatdorlik bildirgan.
