Telegram’da Ilon Maskga qarashli Grok chat-botidan foydalanish imkoniyati paydo boʻldi.
Telegram Premium obunasiga ega foydalanuvchilar hozirda Grok’dan bepul foydalanishi mumkin.
Ilon Maskning xAI kompaniyasi tomonidan yaratilgan Grok chat-boti endi Telegram’da ham foydalanish mumkin. Bu haqda tadbirkor X (sobiq Twitter) ijtimoiy tarmogʻida eʼlon qildi.
Kompaniya X tarmogʻidagi kabi Telegram’da ham Grok’ni barcha foydalanuvchilar uchun bepul taqdim qilmadi. Hozirda faqat Telegram Premium obunachilarigina undan foydalanishi mumkin.
Bot oxirgi versiya – Grok 3 asosida ishlaydi. Biroq, ishlab chiquvchilar taʼkidlaganidek, Telegram versiyasida Think (mantiqiy mulohaza yuritish) va DeepSearch (manbalarni chuqur tahlil qilish) funksiyalari mavjud emas. Ushbu imkoniyatlar faqat Grok’ning maxsus ilovasi va X platformasi uchun eksklyuziv boʻlib qoladi.
Ilon Mask ushbu modelni yer yuzidagi eng aqlli sunʼiy intellekt deb atagan. 18 fevral kuni oʻtkazilgan jonli efirda kompaniyaning maʼlum qilishicha, Grok-3 matematik, ilmiy va dasturlash mezonlari boʻyicha Alphabet Inc’ga tegishli Google Gemini, DeepSeek’ning V3 modeli, Anthropic’ning Claude va OpenAI’ning GPT-4o modellaridan ustun kelgan.
Modelning toʻliq imkoniyatlaridan X platformasi, rasmiy sayt yoki ilova orqali foydalanish mumkin.
Avvalroq, Telegram doimiy foydalanuvchilari soni 1 milliardga yetgani xabar qilingan edi. Maʼlumotga koʻra, oʻrtacha har bir foydalanuvchi kuniga Telegram’ni 21 marta ochib, ilovada 41 daqiqa vaqt oʻtkazmoqda.
