Telegram’да Илон Маскга қарашли Grok чат-ботидан фойдаланиш имконияти пайдо бўлди.
Telegram Premium обунасига эга фойдаланувчилар ҳозирда Grok’дан бепул фойдаланиши мумкин.
Илон Маскнинг xAI компанияси томонидан яратилган Grok чат-боти энди Telegram’да ҳам фойдаланиш мумкин. Бу ҳақда тадбиркор Х (собиқ Twitter) ижтимоий тармоғида эълон қилди.
Компания Х тармоғидаги каби Telegram’да ҳам Grok’ни барча фойдаланувчилар учун бепул тақдим қилмади. Ҳозирда фақат Telegram Premium обуначиларигина ундан фойдаланиши мумкин.
Бот охирги версия – Grok 3 асосида ишлайди. Бироқ, ишлаб чиқувчилар таъкидлаганидек, Telegram версиясида Think (мантиқий мулоҳаза юритиш) ва DeepSearch (манбаларни чуқур таҳлил қилиш) функциялари мавжуд эмас. Ушбу имкониятлар фақат Grok’нинг махсус иловаси ва Х платформаси учун эксклюзив бўлиб қолади.
Илон Маск ушбу моделни ер юзидаги энг ақлли сунъий интеллект деб атаган. 18 февраль куни ўтказилган жонли эфирда компаниянинг маълум қилишича, Grok-3 математик, илмий ва дастурлаш мезонлари бўйича Alphabet Inc’га тегишли Google Gemini, DeepSeek’нинг V3 модели, Anthropic’нинг Claude ва OpenAI’нинг GPT-4о моделларидан устун келган.
Моделнинг тўлиқ имкониятларидан Х платформаси, расмий сайт ёки илова орқали фойдаланиш мумкин.
Аввалроқ, Telegram доимий фойдаланувчилари сони 1 миллиардга етгани хабар қилинган эди. Маълумотга кўра, ўртача ҳар бир фойдаланувчи кунига Telegram’ни 21 марта очиб, иловада 41 дақиқа вақт ўтказмоқда.
