Soliq huquqbuzarliklari haqida xabar berganlarga qancha pul berilgani maʼlum qilindi
Joriy yil boshidan soliq huquqbuzarliklari haqida 72 mingdan ortiq murojaat yoʻllangan.
Yirik soliq toʻlovchilar boʻyicha hududlararo soliq inspeksiyasining xabar berishicha, 2024 yil yanvar-sentabr oylarida “Soliq” mobil ilovasining “Soliq hamkor” tizimi orqali soliq huquqbuzarliklari haqida 72 517 ta murojaat kelib tushgan.
Shundan:
66 ming 016 tasi xarid cheki bermaslik;
3 ming 352 tasi toʻlovni plastik karta orqali qabul qilmaslik;
156 tasi plastik karta uchun xarid summasini oshirish;
2 ming 993 tasi boshqa turdagi huquqbuzarlik holatlari boʻyicha.
Murojaatlarning 39 ming 757 tasi takroriy boʻlganligi yoki shikoyat kelib tushgan tadbirkorlik subʼektida tekshiruv davom etayotganligi sababli koʻrib chiqilmagan.
Murojaatlar asosida 26 ming 400 ta sayyor soliq tekshiruvi oʻtkazilib, 99,1 foiz holatda huquqbuzarlik tasdiqlangan.
Huquqbuzarlik holatlari boʻyicha xabar bergan fuqarolarga 25 ming 870 ta holat boʻyicha (undirilgan jarima summasidan 20 foiz) 17,2 milliard soʻm mukofot toʻlangan.
