Goldman Sachs 2025 yil oxiri uchun oltin narxi prognozini 3 100 dollarga oshirdi
Bankning fevral oyidagi prognozlari ancha optimistik boʻlib, turli omillar natijasida narx bundan-da yuqoriga koʻtarilishi mumkin.
2025 yil 17 fevral holatiga koʻra, Goldman Sachs (Amerikaning transmilliy investitsiya banki va moliyaviy xizmatlar kompaniyasi – tahr.) yil oxirigacha troya unsiya uchun oltin narxi prognozini 2 890 dollardan 3 100 dollarga oshirdi. Bu optimistik yondashuv markaziy banklarning doimiy xaridlariga asoslangan boʻlib, mazkur omil yil oxiriga borib oltin narxiga 9% qoʻshimcha oʻsish olib kelishi mumkin.
Avvalroq, 2025 yil yanvarida, Goldman Sachs prognozni 3 000 dollardan 2 910 dollarga pasaytirgan edi. Fevral oyidagi 3 100 dollarlik yangilanish esa bu qarordan voz kechish va aksincha, geosiyosiy noaniqlik va markaziy banklarning faol xaridlari natijasida prognozni qayta koʻtarish bilan izohlanadi.
Oldingi prognozlar:
| Sana | Yil oxiri uchun prognoz | Avvalgi prognoz |
| 2024 yil oktabr | 3 000 | — |
| 2025 yil yanvar | 2 910 | 3 000 |
| 2025 yil fevral | 3 100 | 2 890 |
Asosiy omillar
1. Markaziy banklarning talab hajmi:
Oldin 41 tonna oylik xarid prognoz qilingan boʻlsa, endi 50 tonna deb qayta baholanmoqda. Agar markaziy banklar oyiga 70 tonna oltin xarid qilsa, narx yil oxiriga qadar 3 200 dollarga yetishi mumkin.
2. ETF (birja fondlari) investitsiyalari:
Foiz stavkalarining pasayishi ETF’larga boʻlgan talabni oshirishi mumkin. Agar investorlar pozitsiyalarini normallashtirsa ham, ETF talabi bozorni qoʻllab-quvvatlashi kutilmoqda.
3. Siyosiy noaniqlik:
Agar tariflar va siyosiy beqarorlik davom etsa, Goldman Sachs oltin narxi 3 300 dollarga yetishini taxmin qilmoqda. Agar AQSh davlat qarzi va fiskal siyosati boʻyicha xavotirlar ortsa, oltin narxi 2025 yil dekabriga qadar 3 250 dollarga chiqishi mumkin.
Maʼlumot uchun, oltin narxi 20 fevralda birinchi marotaba bir troya unsiya uchun 2 950 dollarga yetib, yana bir tarixiy rekordni oʻrnatdi. Ayni paytda narx 2 945 dollarni tashkil qilmoqda.
Oʻzbekistonda mazkur xabar tayyorlanayotgan paytda oltin quymalari bir gramm uchun 1 mln 257 ming soʻmdan sotilmoqda. Eng kichik hajmli quyma (5 gr) 6 mln 287 ming soʻm boʻlsa, 17 yanvardan boshlab sotuvga chiqarilgan 100 grammlik quyma narxi esa 125 mln 739 ming soʻmni tashkil qilmoqda.
