Goldman Sachs joriy yilgi 3000 dollarlik oltin narxi prognozini qaytarib oldi
Yaqinda oltin narxi 3 ming dollarga chiqishini prognoz qilgan kompaniya AQSh’da foiz stavkalari kichikroq miqdorda kamaytirilishi mumkinligi fonida endilikda bank bir unsiya oltin uchun 3 minglik chegara buzilishini kutmayapti.
Goldman Sachs (Amerikaning transmilliy investitsiya banki va moliyaviy xizmatlar kompaniyasi – tahr.) tahlilchilari oltin narxlariga oid prognozlarini qayta koʻrib chiqdi.
Ularning dastlabki taxminlariga koʻra, 2025 yil oxirida oltin narxi 3,000 dollarga yetishi kutilgan edi. Ammo Federal zaxiraning foiz stavkalarini avval oʻylanganidan kamroq pasaytirishi ushbu prognozni oʻzgartirishga olib keldi. Endi ekspertlar bu koʻrsatkichga faqat 2026 yilning oʻrtalariga kelib erishiladi deb hisoblamoqda.
Oltin narxining qisqa muddatli prognozi
Tahlillarga koʻra, joriy yil oxiriga borib oltin narxi 2,910 dollar atrofida boʻladi. Ushbu prognoz AQSh prezidentlik saylovidan keyin mamlakatda siyosiy noaniqlikning kamayishi va oltin ETF’larining (ETF – Exchange Traded Fund, birja savdo fondi – tahr.) pasayishi bilan bogʻliq. Natijada, 2025 yil boshida oltin narxlari pastroq darajadan boshlanishi kutilmoqda.
Markaziy banklar va oltin bozori
Uzoq muddatda markaziy banklarning oltin xaridlari narxlarning oʻsishini taʼminlashda asosiy omil boʻlib qoladi. Goldman Sachs tahlilchilari markaziy banklar har oy oʻrtacha 38 tonna oltin xarid qilishini prognoz qilmoqda. Bu, bir tomondan, global iqtisodiy beqarorlikni bartaraf etish vositasi boʻlsa, boshqa tomondan, oltinning yuqori narx darajasini qoʻllab-quvvatlaydi.
2024 yildan beri oʻzgaruvchanlik
Oʻtgan yilda oltin narxi 27% ga oshdi va investorlar uchun jozibador aktiv boʻlib qoldi. Biroq, 2024 yil noyabr oyidan boshlab dollar kursining mustahkamlanishi va Federal zaxiraning inflyatsiyaga ehtiyotkor yondashuvi oltin bozoriga bosim oʻtkazdi. AQShning yuqori foiz stavkalari oltin kabi aktivlarga boʻlgan talabni kamaytiradi.
Foiz stavkalari va oltin narxiga taʼsir
Goldman Sachs joriy yilda foiz stavkalari 75 bazaviy punktga pasaytirilishini kutmoqda. Odatda foiz stavkalarining pasayishi oltin narxiga ijobiy taʼsir qiladi, chunki bu investorlarni boshqa aktivlar oʻrniga oltinni tanlashga undaydi. Ammo Federal zaxiraning ehtiyotkor siyosati ushbu taʼsirni sekinlashtirishi mumkin.
Global iqtisodiy muhitning murakkabligi va AQShdagi iqtisodiy oʻzgarishlar oltin narxining oʻsishiga uzoq muddatli taʼsir oʻtkazishi kutilmoqda. Shu bilan birga, markaziy banklarning oltin xaridlari, geosiyosiy noaniqliklar va inflyatsiyaga qarshi kurash strategiyalari oltinning barqarorligini taʼminlashda muhim ahamiyat kasb etadi.
Mavzuga doir: Oʻzbekistonda oltinni qanday sotib olish mumkin?
