Markaziy bank 100 grammli oltin quymalarni sotuvga chiqarmoqda
Oʻzbekistonda mazkur oltin quymalarni qayerdan va qanday sotib olish mumkin?
Markaziy bank aholining investitsiya va jamgʻarish imkoniyatlarini yanada oshirish hamda qimmatbaho metallar muomalasini kengaytirish maqsadida 2025 yilning 17 yanvaridan boshlab ogʻirligi 100 gramm boʻlgan oltindan tayyorlangan oʻlchovli quymalarni tijorat banklari orqali sotuvga chiqarmoqda.
Bungacha mamlakatda 5, 10, 20, 50 grammli oltin quymalarini sotib olish mumkin yedi.
Nima uchun oltin xavfsiz investitsiya hisoblanadi?
Oltin oʻzining ichki qiymati, kamyobligi va iqtisodiy pasayishlar va geosiyosiy inqirozlar davridagi tarixiy koʻrsatkichlari tufayli xavfsiz investitsiya deb hisoblanadi. U inflyatsiya va valyuta qadrsizlanishiga qarshi himoya vositasi sifatida xizmat qiladi.
Xabarda qayd etilishicha, quymalar maxsus himoya qadoqlarida sotuv uchun taqdim etiladi. Oltin quymalarning qadogʻi sertifikat vazifasini bajarib, oʻz seriya raqamiga ega boʻladi.
Qadoqlari shikastlanmagan oltin quymalar sotuv shoxobchalarida quyma egasiga toʻlovni amalga oshirish orqali qaytarib sotib olinadi.
Qadogʻi buzilgan yoki texnik talablarga mos kelmaydigan oltin quymalarni qaytarib sotib olish ularni texnik ekspertizadan oʻtkazish orqali amalga oshiriladi va ekspertiza oʻtkazilgandan soʻng toʻlov toʻlab beriladi.
Qadogʻi but holatdagi oltin quymalarni Oʻzbekiston Respublikasi hududidan tashqariga olib chiqishga ruxsat beriladi.
Oʻzbekistonda oltinni qanday sotib olish mumkin?
Oʻzbekistonda Markaziy bank tomonidan 999,9 soflikdagi oltindan 5, 10, 20, 50 va 100 grammli quymalar sotuvga chiqarilgan va quymalar narxini regulyator har kuni yangilab boradi. Oltin quymalarini banklardan sotib olish imkoniyati mavjud. Banklarning manzillari va batafsil maʼlumotlarni Markaziy bank rasmiy saytidan topish mumkin.
