Fitch Ratings Oʻzbekiston kredit reytingini “BB” darajasiga koʻtardi
Agentlik oʻz qarorini mamlakatda islohotlar jadallashgani va oʻrta muddatli iqtisodiy oʻsish istiqbollari ijobiyligi bilan izohladi.
Bungacha S&P Global va Moody’s agentliklari Oʻzbekiston kredit reytingi prognozini “ijobiy”ga koʻtargan edi.
Fitch Ratings xalqaro reyting agentligi Oʻzbekistonning xorijiy valyutadagi uzoq muddatli kredit reytingini “BB-” dan “BB” darajasiga koʻtardi. Bu reytingga nisbatan prognoz esa — “barqaror” boʻlib qolmoqda.
Agentlik bu qarorni mamlakatda olib borilayotgan islohotlarning jadallashuvi va oʻrta muddatli iqtisodiy oʻsish istiqbollarining yaxshilanishi bilan izohladi. Fitch fikricha, bu omillar makroiqtisodiy xatarlarni kamaytirishga yordam beradi hamda Oʻzbekistonning kreditga oid asosiy koʻrsatkichlarini mustahkamlashga xizmat qiladi.
Fitch quyidagi sohalardagi islohotlarni alohida ajratib koʻrsatdi:
- Markaziy bank siyosatiga boʻlgan ishonchni oshirish va pul-kredit mexanizmlarini yaxshilash;
- Davlat mulklarini xususiylashtirish boʻyicha ishlarni faollashtirish;
- Davlat idoralarining ochiqligi va shaffofligini kuchaytirish.
Shuningdek, energiya tariflarini bosqichma-bosqich bozor tamoyillariga moslashtirish va subsidiyalarni qisqartirish hisobiga 2024 yilda davlat byudjeti koʻrsatkichlari kutilganidan yaxshiroq chiqdi. Bu esa, oʻz navbatida, davlat boshqaruvi sifatining asta-sekin yaxshilanayotganidan darak beradi, deya taʼkidlaydi Fitch, garchi bu boradagi koʻrsatkichlar hanuzgacha ayrim tengdoshlari bilan solishtirganda pastroq boʻlsa ham.
Oʻzbekistonning asosiy ustun tomonlari sifatida quyidagilar qayd etildi:
- Davlat qarzining nisbatan pastligi;
- Katta hajmdagi valyuta va byudjet zaxiralari;
- Kuchli iqtisodiy oʻsish imkoniyatlari.
Biroq ayrim omillar, xususan aholi jon boshiga toʻgʻri keladigan YaIMning pastligi, iqtisodiyotning xomashyo, asosan, oltin eksportiga bogʻliqligi, yuqori inflyatsiya darajasi va moliyaviy tizimda dollarlashuvning saqlanib qolayotgani hali-hanuz salbiy taʼsir koʻrsatmoqda.
May oyi oxirida xalqaro reyting agentligi S&P Global Oʻzbekistonning kredit reytingi boʻyicha prognozini “barqaror”dan “ijobiy”ga koʻtargan edi. Oradan koʻp oʻtmay, iyun oyida yana bir yirik agentlik — Moody’s ham prognozni “ijobiy” darajaga yaxshiladi.
