5 grammli oltin quyma narxi ilk bor 8 million soʻmdan oshdi
9 oktabr holatiga koʻra, Oʻzbekistonda oltin quymalari narxi yana rekord yangiladi.
Markaziy bank maʼlumotiga koʻra, bir gramm oltin 1 mln 608 ming soʻmni tashkil qildi, 5 grammli quyma esa ilk bor 8 mln 43 ming soʻmga yetdi.
Yil boshidan beri narxlar 38 marta rekord yangilab, umumiy oʻsish 43,8 foizni tashkil qilmoqda.
Oʻzbekistonda oltin quymalari narxi ketma-ket rekordlarni yangilamoqda.
Markaziy bank maʼlumotiga koʻra, 2025 yil 9 oktabr holatida bir gramm oltin quymaning narxi 1 mln 608 ming soʻmga yetdi. Shu tariqa, 5 grammli oltin quymaning narxi tarixda ilk bor 8 million soʻmdan oshdi.
Hozirda narxlar quyidagicha belgilangan:
- 5 gramm — 8 mln 43 ming soʻm
- 10 gramm — 16 mln 85 ming soʻm
- 20 gramm — 32 mln 170 ming soʻm
- 50 gramm — 80 mln 425 ming soʻm
- 100 gramm — 160 mln 851 ming soʻm
Yil boshidan buyon Oʻzbekistonda oltin quymalari narxi 38 marta rekord yangiladi. Shu davr mobaynida narxlar 43,8 foizga oshgan.
Narxlarning bunday keskin oʻsishi bevosita jahon bozoridagi holat bilan bogʻliq. Xususan, 8 oktabr kuni jahon bozorida oltinning narxi tarixda ilk bor 4 ming dollardan oshdi.
Oltin narxining koʻtarilishi hisobiga mamlakatning oltin-valyuta zaxiralari ham rekordni yangilab, 55 mlrd dollarga yaqinlashdi.
