Ўзбекистон халқаро захиралари июнь ойида $1,1 млрдга камайди
Захиралардаги бундай пасайиш хорижий валюталардаги захира активлар ҳисобига юзага келган бўлиб, кўрсаткич ой давомида қарийб $1,9 млрдга камайиб, $9,56 млрдни ташкил этди.
Аксинча, захиралар таркибидаги олтин миқдори қиймат жиҳатидан $763 млнга ўсди.
Бу ҳолат Ўзбекистон учун кетма-кет тўрт ой давом этган олтин экспорти даври тугаганидан дарак беради. Нархларнинг пасайиши фонида мамлакат олтинни ушлаб қолиш ёки сотиб олишга эътибор қаратаётган бўлиши мумкин.
Марказий банк ҳисоботига кўра, 1 июнь ҳолатида Ўзбекистоннинг халқаро олтин-валюта захиралари $48,55 млрдга етди. Бу май ойига нисбатан $1,1 млрдга камроқдир.
Захиралардаги бундай пасайиш хорижий валюталардаги захира активлар ҳисобига юзага келган. Кўрсаткич ой давомида қарийб $1,9 млрдга камайиб, $9,56 млрдни ташкил қилди.
Ушбу захиралар таркибидаги нақд валюта ва депозитларнинг жами миқдори $10,7 млрддан $9,85 млрдгача пасайиб, йил бошидаги миқдорга қайтган.
| Кўрсаткичлар | 1 январь 2025 | 1 июнь 2025 | 1 июль 2025 |
| Расмий захира активлари (млрд $) | 41,2 | 49,66 | 48,55 |
| Олтин (млрд $) | 32,03 | 37,65 | 38,42 |
| Соф ҳажми (млн троя унция) | 12,3 | 11,4 | 11,7 |
| Хорижий валютадаги захира активлари (млрд $) | 8,6 | 11,44 | 9,56 |
Айни пайтда, валюта захиралари камайган бир вақтда олтин захиралари ортган. Олтин ҳажми физик жиҳатдан қарийб 10 тоннага кўпайди, бу эса қиймат жиҳатдан $763 млнлик ўсишни англатади. Натижада олтин захиралари $38,4 млрдга етди.
Бу ҳолат Ўзбекистон учун кетма-кет тўрт ой давом этган олтин экспорти даври тугаганидан дарак беради. Нарх тушиши туфайли мамлакат олтинни ушлаб туриш ёки сотиб олишга эътибор қаратаётган бўлиши мумкин.
Ўзбекистон Жаҳон олтин кенгашининг сўнгги учта ҳисоботида олтин экспорти бўйича етакчи мамлакат сифатида қайд этилган эди. Хусусан, февраль ойида 12 тонна олтин сотиб, Қозоғистондан (8 тонна) ўзиб кетган ва жаҳонда энг йирик экспортчи бўлган. Март ойида эса 11 тонна олтин экспорт қилиниб, бу позиция сақлаб қолинган.
Апрель ойида экспорт қилинган олтиннинг қиймати $1,91 млрдга тенг бўлган. Бу ойда ҳам мамлакат 11 тонна олтин экспорт қилган.
Бироқ май ойида олтин экспорти атиги 1 тоннани ташкил этиб, Ўзбекистон иккинчи ўринга тушди. Июнь ойида эса мамлакат олтин сотган эмас, аксинча, уни харид қилгани маълум бўлди.
Бошқа томондан, Citi bank ўзининг сўнгги ҳисоботида глобал иқтисодий ўсиш истиқболларининг яхшиланиши ва инвестицион талабнинг сусайиши фонида, олтин нархи 2025 йил охири ёки 2026 йил бошларида бир унция учун $3,000 даражасидан пастга тушиши мумкинлигини прогноз қилмоқда.
Банк прогнозларига кўра, 2026 йилнинг иккинчи ярмида олтин нархлари $2,500–$2,700 оралиғига қайтиши мумкин.
