Bitcoin нархи февраль ойидан бери илк маротаба $97 000 дан ошди

Bitcoin нархи май ойи бошида $97 000 дан ошиб ўтди. Бу апрел ойида қайд этилган $75 000 лик пастки нуқтадан 29% тикланишни ва феврал ойидаги кескин тушишдан кейин энг кучли натижани англатади.

Таҳлилчилар бу ўсишни йирик компанияларнинг Bitcoin харидлари ва бозорга кириб келаётган капитал оқими билан боғлашмоқда. Хусусан, Strategy ва Metaplanet каби компаниялар Bitcoin сотиб олишни давом эттирмоқда. Strategy компанияси бир ҳафтада $1,4 млрдлик Bitcoin харид қилган бўлса, Япониянинг Metaplanet компанияси $481 млнлик Bitcoin жамғарган.

Феврал ойида Дональд Трампнинг агрессив савдо сиёсатлари Bitcoin нархининг пасайишига сабаб бўлган эди. Энди эса Bitcoin февралдаги $78 900 ва апрелдаги $75 000 лик минимал даражалардан сезиларли даражада тикланди.

Tiger Research компаниясининг бош таҳлилчиси Райан Юннинг таъкидлашича, Bitcoin нархининг ошиши қисқа муддатли тебраниш эмас, балки узоқ муддатли ўсиш тенденциясининг белгиси ҳисобланади. Унинг фикрича, Bitcoin эндиликда спекулятив актив эмас, балки институционал инвесторлар портфелининг ажралмас қисмига айланмоқда.

Funkybit компанияси асосчиси Эндрю Лоуренснинг таъкидлашича, Bitcoin энди бошқа хавфли инвестиция турларидан ажралиб, бойликни сақлаб қолиш учун ишончли восита сифатида қаралаётгани кузатилмоқда. Унга кўра, дунёда пул сиёсатидаги ноаниқликлар фонида Bitcoin нархи янада ўсиши мумкин.

Хабар тайёрланаётган пайтда Bitcoin $96 360 атрофида савдо қилинмоқда.