2025 yilning yanvar-aprel oylarida Oʻzbekiston fuqarolari tomonidan xorijiy davlatlarga turistik va boshqa maqsadlarda amalga oshirilgan safarlar soni sezilarli darajada oshdi.

Rasmiy maʼlumotlarga koʻra, mazkur toʻrt oylik davrda umumiy hisobda 2 million 116 ming 900 nafar fuqaro chet elga safar qilgan. Bu koʻrsatkich 2024 yilning ayni davri bilan solishtirilganda, 404 ming 500 nafarga yoki 23,6 foizga koʻproqdir.

Oʻzbekistonliklar eng koʻp tashrif buyurgan davlatlar roʻyxatida birinchi oʻrinda Qirgʻiziston turadi. Ushbu qoʻshni davlatga 899 ming nafar fuqaro chiqqan. Ikkinchi va uchinchi oʻrinlarni mos ravishda Tojikiston (388,4 ming nafar) hamda Qozogʻiston (354,9 ming nafar) egallagan. Bu holatni uchala davlat oʻrtasidagi geografik yaqinlik, madaniy va ijtimoiy aloqalarning kuchliligi bilan izohlash mumkin.

Shuningdek, Saudiya Arabistoni ham oʻzbekistonliklar orasida mashhur yoʻnalish boʻlib, bu davrda u yerga 133,6 ming nafar fuqaro tashrif buyurgan.

Keyingi oʻrinlarda esa Rossiya (93,9 ming nafar), Turkiya (64,2 ming nafar), Birlashgan Arab Amirliklari (58,8 ming nafar), Misr (22,4 ming nafar), Tailand (15,4 ming nafar) va Vetnam (11,4 ming nafar) kabi mamlakatlar turadi. Bundan tashqari, boshqa turli davlatlarga ham jami 74,6 ming nafar fuqaro tashrif buyurgani qayd etilgan.

Safarlarning maqsadlari boʻyicha tahlil qilinganda, ularning katta qismi – 1,7 million nafari – qarindoshlarni yoʻqlash bilan bogʻliq boʻlgan. Shuningdek, 399,1 ming nafar fuqaro sayyohlik, 15,2 ming nafari davolanish, 9,9 ming nafari oʻqish va 4,7 ming nafari xizmat safari maqsadida chet elga chiqqan.

Oʻzbekiston eksporti 2025 yilda 33,4 mlrd dollarga yetdi

Oʻzbekistonliklar eng koʻp qaysi davlatlarga va nima maqsadda chet elga chiqmoqda?