Kredit karta – bu bank yoki moliyaviy muassasa tomonidan mijozga taqdim etiladigan toʻlov vositasi boʻlib, u orqali mijoz oʻz mablagʻidan tashqari, bank tomonidan ajratilgan kredit liniyasidan foydalanishi mumkin. Bu karta orqali tovar va xizmatlar uchun toʻlovlarni amalga oshirish yoki naqd pul olish imkoniyati yaratiladi. Kredit kartalar mijozlar uchun qulaylik yaratib, xaridlarni amalga oshirishda qoʻshimcha mablagʻ manbai boʻlib xizmat qiladi.

Kredit kartaning paydo boʻlishi 1950 yillarga borib taqaladi. Dunyo boʻylab birinchi kredit karta Diners Club tomonidan joriy etilgan. Oʻsha paytda bu karta faqat restoranlar va mehmonxonalarda ishlatilgan boʻlsa, hozirda ular global miqyosda har xil savdo va xizmat koʻrsatish tarmoqlarida qabul qilinadi. Kredit kartalar moliyaviy texnologiyalarning rivojlanishi bilan zamonaviy hayotning ajralmas qismiga aylandi.

Kredit kartalardan xuddi oddiy kartalardek istalgan turdagi toʻlovlar uchun foydalanish mumkin.

Foizlar qanday hisoblanadi?

Kredit kartadan foydalanilganda, karta egasiga ajratilgan kredit summasi uchun maʼlum foiz stavkasi hisoblanadi. Bu foiz, odatda, quyidagilarga bogʻliq boʻladi:

1. Grace period (imtiyozli davr). Maʼlum bir muddat davomida toʻlov amalga oshirilsa, kartadan ishlatilgan mablagʻ boʻyicha foizlar hisoblanmaydi.

2. Oylik foiz stavkasi. Agar kredit summasi belgilangan muddatda qaytarilmasa, foydalanilgan mablaqqa nisbatan foizlar hisoblanadi.

3. Minimal toʻlov. Har oyda karta egasi minimal toʻlovni amalga oshirishi talab etiladi. Agar bu toʻlov amalga oshirilmasa, jarimalar yoki qoʻshimcha foizlar qoʻllanilishi mumkin.

Kredit kartadan samarali foydalanish uchun bank shartnoma tuzayotganingizda shartlar bilan batafsil tanishib chiqish talab etiladi.

Mavzuga doir: Kredit olishdan avval nimalarga eʼtibor berish kerak?

Kredit kartaning afzalliklari orasida qulaylik va tezkorlik alohida oʻrin tutadi. Kredit karta yordamida nafaqat doʻkonlarda, balki onlayn platformalarda ham toʻlovlarni amalga oshirish mumkin. Bu esa kundalik xaridlarni ancha osonlashtiradi. Kredit karta favqulodda vaziyatlarda qoʻshimcha moliyaviy manba sifatida ham xizmat qiladi. Masalan, kutilmagan xarajatlar paydo boʻlganda yoki qoʻshimcha pul kerak boʻlgan holatlarda kredit karta yordamida tezkor yechim topish mumkin. Kredit kartalarning aksariyati xalqaro toʻlov tizimlari bilan integratsiyalashganligi sababli, xorijiy davlatlarda ham foydalanish imkoniyatini beradi.

Kredit karta nima va uning qanday afzalliklari mavjud?